Hnahthial Post | July 10, 2025, Hnahthial: Vawiin khan Establishment of Hnahthial District Veterinary Hospital, Laboratory & Quarter, cheng nuai 235 (Rs 235 lakhs) a sak, NABARD RIDF-XXVII hmanga fund chu AH&Vety Minister, Pu C. Lalsawivunga chuan khuallian niin a hawng a, Bialtu MLA, Pu Jeje Lalpekhlua chuan khual zahawm niin a tawiawm a ni.
Minister chuan Hnahthial District-ah Veterinary Hospital hawn a ni dawn ta chu sawrkar hnathawkte mai bakah mipuite thawhrimna leh thahnem ngaihna rah, a taka kan hmuh a ni a ti a. Hnahthial chu District te ber mah ni se, District thang duang leh theihna nghah tak an nih thu sawiin mipui ten tangkai taka an hman ngei a beisei thu leh Hospital chu tun baka tih changtlun belh zel an tum thu a sawi a ni.
Kan ram chu Sa, artui leh bawnghnuteah te a intodelhloh hle thu sawiin kan intodelh theihna turin ngaihtuahna tak tak kan sen a tul takzet thu a sawi a. Artui lama kan intodelh theih nan Thenzawlah project neih tum niin tunah tender float mek a nih thu a sawi bawk. Sa a intodelh tur chuan ran chawah kan intodelh hmasak a tul thu sawiin chumi tur atan chuan bawng leh ran chaw a kan intodelh theihna turin vaimin pilot project mai bakah district hrang hrangah fodder project kalpui tum mek a nih thu a tarlang a. Chuvang chuan Vety hian ram awl an ngah anga an ngaih thin hi mipuite chuan hrethiamin ram awl ni lovin ran an tlatna tur a ni tih lo hriatthiam sak turin a ngen nghal a ni. Vawk pul hri vanga sum tam tak chante a tawrhpui thu sawiin ASCAD atanga sawrkar laipuiin compensation sum an la pek chhuah loh chu hmu turin an nawr mek thu a sawi bawk.
Khual zahawm, Pu Jeje Lalpekhlua pawhin thu sawiin vawiina Veterinary Hospital Hnahthialah ngei kan hawng thei ta hi lawmawm a tih thu a sawi a. Tun hnaiah Ministry of North Eastern Region leh Niti Aayog in hmarchhak District hrang hrangte Sustainable Development Goals index a tihchhuah tharah Hnahthial District in lawmman pakhatna a dawng chu lawmawm a tih thu sawiin he lawmman Hnahthial in a dawn theihna chhan chu sorkar hnathawkte inpekna vang te, NGO leh khawtlang hruaitute hna thawh that vangte a ni tiin tanrualna nen chhunzawm zel turin a chah bawk a ni.
Hospital & Laboratory building hi a dung ft 42 a sei, a vang ft 31 a zau niin Ground floor leh 1st floor a awm a. Ground floor-ah hian : OT -2; Recovery/Dripping Room - 1; Examination room - 1; Registration - 1; Medicine/store room - 1; Waiting area -1 leh Public toilet -2 te an awm a. 1st floor-ah hian Laboratory -1; CVO room -1; VO room - 2; Computer room -1 leh Common toilet - 1 te an awm a ni.
Hei bakah hian Chief Veterinary Officer Quarter leh Veterinary Officer Quarter-te sak bawk an ni.
He hun hi Bawrhsap, Pi K.Vanlalruati chu kaihruaiin Dr. M. Zohmingthangi, Addl Director AH & Vety Dept. chuan inlawmna thu a sawi a. Dr. T. Lalthanpuia, Addl. Director chuan Technical report pe in AH & Vety Department hotute, LMC Counselor te, Hnahthial District chhunga Head of Office te, khawtlang hruaitu VC te, NGO hruaitute leh MJA member-te he hunah hian an tel a. Dr. C. Sanghluna, DVO chuan lawmthu sawiin hun hi a khar a ni.
Tags
News