Hnahthial Post | July 15, 2025, Hnahthial: Ministry of Culture ruahmanna hnuaia buatsaih, India Danpui thah cham - 'Samvidhan Hatya Diwas' pualin vawiin khan Hnahthial DC Conference Hall-ah hun hman a ni a. Bawrhsap, Pi K.Vanlalruati chuan he hun hman a nih chhan sawifiahin SDO Sadar, Pi Esther Leihang chuan programme hi a kaihruai a ni.
Bawrhsap chuan kum 1975-a National Emergency puan a nih champha hriat reng nan mai mi lovin Indian Danpui (Constitution) hman sual a nih dan leh hman sual a nih tawh loh nana mipuite kan inralrin reng theihna tur atana he hun hi buatsaih a nih thu a tarlang a. June 25, 1975 khan khatih hun laia Prime Minister, Pi Indira Gandhi rorelna hnuaiah Ram chhunga buaina (Internal Disturbance) chhuanlamin Indian Danpui Article 352 hmangin President, Pu Fakhruddin Ali Ahmed chuan National Emergency a puan thu a sawi a. Emergency puan a nih atang hian mipute dikna chanvo nasa taka rah beh a nih thu tarlangin, "Chanchinbu mite chu duh duh pho chhuak theilo tura hrek beh an ni a. Mipuite, a bikin mi retheite zalenna leh dikna chanvo rah behna rapthlak tak thlengin India ramin zalenna a neih hnu a hun thim ber, tih hiala sawi a lo ni ta a ni" tiin he hun hman a tul chhan a sawi a ni.
Kum 1975, June ni 25 a Emergency puan khan thla 21 zet awhin kumin hi puan a nih atanga kum 50 a tlin cham a ni a. Sawrkar laipui chuan he champha pual hian Indian ram pumpuiah June 25 atang July ni 25 thleng hian Samvidhan Hatya Diwas hi hmang turin ruahmanna a siam a ni.
Tags
News