Hnahthial Post | July 4, 2025, Aizawl: MZP General Headquarters Aizawl chuan vawiin ni 4 July, 2025 (Zirtawpni) chawhma dar 11 khan I&PR Auditorium Aizawl-ah Under Graduate result 2025 a Gold Medalist-te chawimawina hun an hmang a. He hun hi Pu Richard Vanlalhmangaiha MP (Lok Shaba) chuan khuallian niin a hmanpui a. Er. Lalhriatpuia IAS, Aizawl DC chu khualzahawm a ni.
MZP-in Gold Medalist a chawimawite hi Arts atangin Lalremsiama (Political science) Pachhunga University College, Commerce atangin R. Lalngaihawmi (HATIM, Lunglei), Science atangin Mary Lalawmpuii (Home Science) Govt. Zirtiri Residential Science College leh Computer Application atangin Lalruatfela Chhakchhuak (Govt. Zirtiri Residential Science College) te an ni.
He hunah hian College SU, Hnampual zirlai pawl leh MZP chhungkua degree nei thar mi 88 hnenah lawmpuina thuziak hlan an ni bawk.
MZP President Pu H. Lalthianghlima chuan thu sawiin, "Tun hnaiah hna lak dik lo sawi a awm leh zauh thin a, MZP-in chhui tir mek te pawh kan nei a, hei hi pawi kan ti hle a ni. Sawrkar hnuaia hna lak eng pawh hi fair takin kalpui nise, a thiam leh tling apiang lak mai nise tih hi MZP duh dan a ni" a ti bawk.
MZP President chuan, Samagra hnuaia tun hnaia hna hrang hrang lakah a tling leh thiam, a thawksa leh qualified te aia qualified lo zawk lak an awm nia sawi awm mek hi kan chhui mek a. Sawrkar hian tun July thla chhung ngei hian he hna lak hi siamtha ngei se a duh a ni a ti.
Khuallian Pu Richard Vanlalhmangaiha MP (Lok Shaba) chuan, MP ka nih angin Delhi tlangah Mizoram palaiin ka khawsa mek a. All India Service leh Central Service-ah Mizote kan tlem ta lutuk hi rualawh a na hle a. Thalaiten hetiang lam hi hawi deuh deuh se ka duh a ni a ti.
Mizoram MP chuan, All India Service a luh tumna tak tak neite tan puih ka inhuam reng a. Tunah pawh puih mek ka nei a. Mi taima, tumna tak tak nena bei mek, harsatna neite puih ka inhuam a, min rawn be hreh lo turin ka ngen che u a ni. Kan ram hi chhe ta vek leh tha lo lutuk anga sawi awm thin mahse, state dangte nen khaikhin chuan kan ram hi kawng tam takah kan la tha hle a. Tan i la deuh deuh ang u a ti bawk.
Khualzahawm Er. Lalhriatpuia pawhin thu sawiin, Zirlaite hian tanlak kan ngaihna chu rilru leh taksa kan sawizawi that a, engkima fit tura kan inbuatsaih a ngai a. Thiamna aia pawimawh chu taimakna leh tumruhna hi a ni a. Tuihalna nei apiangte an hlawhtling thin a ni tiin zirlaite a fuih.
He hunah hian, MZP Activity hrang hranga tel thin Lawipu Local Council Member atana thlan Pu Lalbiakthanga lawmpuina leh Zofate Chawlhbuk Borapansury lo enkawltu leh Borapansury a MZP intepui banna Pi Saithangpuii Sailo Missionary pension ngaihhruina hlan tel an ni.
MZP Vice President Dr. C. Lalremruatan he hun hi a kaihruai a, Maj. Jerry Lalrozama C.O Salvation Army in hunserh hmangin, Pu Chinkhanmanga Thomte General Secretary in report a pe a. UG Gold Medalist leh an chhungte, College hrang hrang SU Leaders leh Hnampual zirlai pawl hruaitute bakah Pachhunga University College leh Govt. Zirtiri Residential Science College zirlaite an tel a ni.
Tags
News