Hnahthial Post | July 4, 2025, Hnahthial: Vawiin khan HDFA Turf ground-ah "MLA Cup Inter Branch YMA Football Tournament, 2025" chu Minister of State, Pu Lalnghinghlova Hmar chuan khuallian niin kharna hun a hmang a. Deputy Speaker, Pu Lalfamkima; Adviser to CM, Pu H. Ginzalala leh Dr Lorraine Lalpekliana Chinzah; MLA, Pu Jeje Lalpekhlua leh Pu T. Lalhlimpuia te chuan an tawiawm a ni. MoS state hian Hnahthialah Hockey ground leh Boxing hall sak a nih tur thu sawiin Dy. Speaker hian Hnahthial District Football Association (HDFA) hnenah Football panga (5) leh pawisa fai cheng singkhat (Rs 10,000) a hlan a ni.
Khuallian chuan ram pum huapa infiammi tha tak tak lo chher chhuak tawh, Hnahthial District-a Football tournament kharna hun a hmanpui thei chu lawmawm a tih thu a sawi a. Hnahthial District tan hmachhawp tam tak an neih thu sawiin India ramin kum 2036-ah Olympics thlen a thum thu a tarlan rualin Mizo infiammi te tan an tel ve ngei theihna tur sports atan Hockey chu thlan a nih thu a sawi a. Hockey ground siam tum a nih thu leh Hnahthial chu a siamna hmun tur atan thlan a nih thu a tarlang a. Tun dinhmunah Hockey ground sakna tur hmunhma ngaihtuah mek a nih thu sawiin a sakna tur atan cheng vbc 9 leh nuai 88 (Rs. 9.88 crores) dahthat a nih tawh thu a tarlang bawk. Hnahthial chu infiamna lamah hma a lo sawn belh zel theih nan Hockey ground mai bakah hian HDFA turf ground bulah bialtu MLA Fund nen tangkawpin Boxing ring dahna tur Hall sak a nih tur thu a tarlang a ni.
Minister chuan Hnahthial chu infiamna lamah hma an sawn ang bawk hian zirna lamah hma sawn thei se a duh thu sawiin mipuite chu tangrualin kawng engkimah hma sawn zel turin a fuih a ni.
Bialtu MLA, Pu Jeje Lalpekhlua chuan thu sawiin buaina liantham awm lova MLA Cup final an thleng thei chu lawmawm a tih thu a sawi a. Infiamnain ken tel a neih chu insumtheihna a nih thu sawiin infiamna hi damdawi tha tak a ni a ti a. Tun tournament hlawtlin nana hma latu zawng zawngte chungah lawmthu sawiin eng kawngah pawh Hnahthial District chu entawntlak ni thei tura tan la turin mitinte chu a chah a ni.
Final match khelh tan hma hian Minster, Pu Lalnghinglova Hmar leh MLA, Pu Jeje-a team-te chuan Exhibition Match an khel a. Tournament Final Match hi Cherhlun leh Electric Veng ten khelin Cherhlun chuan 3-2 a hnehna changin hnehna nomawi an la a ni.
Lawmman hrang hrang sem niin lawmman lak dan chu a hnuaia tarlang ang hi a ni:-
Man of the Match :- Aaron Vanlalrinchhana, Cherhlun Branch YMA
Top Scorer :- Lalrintluanga, Electric Branch YMA(8 goals)
Best Goalkeeper:- Robin Chawngthanzuala, Cherhlun Branch YMA
Best Player :- Lalthankhuma, Cherhlun Branch YMA
Semi Finalists :- Peniel leh Chanmari Branch YMA
Runner Up :- Electric Branch YMA
Champion :- Cherhlun Branch YMA
Best Fans :- Peniel Branch YMA
Fair Play :- Thingsai Branch YMA
He tournament kharna programme hi Pu Hmingthanzuala, YMA President chuan a kaihruai a. Champion team hian Bawngchal, trophy leh pawisa fai cheng sing sarih (Rs.70,000) dawngin pahnihna hian pawisa fai cheng si li (Rs. 40,000) leh medal an dawng a. Semi finalist team-te hian pawisa fai cheng sing khat (Rs.10,000) an dawng bawk. Hei bakah hian Individual lawmman dawngte hian trophy bakah pawisa fai cheng sangkhat (Rs 1000) theuh an dawng a ni.
Tags
News