Hnahthial Post | July 10, 2025: Lunglei, Sethlun aṭanga Theiriat panna kawng chung chu nimin (9 July) zing khan nasa takin a min a, kawng hi meter 10 vel a bal tel bawk a ni. Hemi avang hian a hnuai kawngpui chhilhin tun dinhmunah helai kawng hnuai leh kawng chungah hian lirthei eng chi mah a tlang thei lova khualzin tangkhangte chu Gov't High School, Theiriat ram chhung zokawngah YMA Member-te ṭanpuinain kein an kaltlang hlawm a ni.
Leimin hi NHIDCL lamin thenfai nghal tum mahse helai chhehvela ram neituin a ramah leivung paih a phal mai loh avangin hun rei tak chhung chu leimin hi thenfai lohin a awm a. District thuneitu ten ruahmanna an siampui hnuah ram neitu leh NHIDCL te hian inremna siamin nimin chawhnu dar 1:20 aṭang khan thenfai a ni a, tun dinhmunah kawng hi a tlang tawh niin Lunglei aṭanga thu dawnna chuan a tarlang a ni.
Helai kawng ping avang hian nimin khan Theiriat leh Lunglei chhim lam veng dang zawngte chuan Sikul leh Pisa an kai thei lo a ni.
Tags
News