Bana kaih Scheme hnuaia ran vulhtute tan 'Livestock Insurance' kalpui dan tur ngaihtuahin MSPCC thukhawm

Hnahthial Post | August 13, 2025, Aizawl: Vawiin khan Planning & Programme Implementation Committee Room-ah Mizoram State Policy Coordination Committee chu Bana Kiah Scheme hnuaia ran vulh thlangtute hman tur ‘Livestock Insurance’ kalpui dan tur ngaihtuahin an thukhawm a. Pu C.Lalsawivunga, Minister, Animal Husbandry & Veterinary Department chuan telpuiin Pu KC Lalmalsawmzauva, Vice Chairman, MSPCC chuan hun a kaihruai a. MSPCC member-te, AH & Vety Department-a hotute, SBI General Insurance Co. Ltd., National Insurance Co. Ltd., United India Insurance Co. Ltd., New India Assurance Co. Ltd., IFFCO- TOKIO General Insurance Co. LTD., Agriculture Insurance Company of India Ltd. leh Partner Bank-a thawktute he hunah hian an tel a ni.

Thutkhawmah hian Mizoram chhunga ran, a bik takin vawk vulhtuten African Swine Fever natna leng thin avangin harsatna nasa tak an tawh thin thu tarlan niin, he natna laka ran an him theih nan Animal Husbandry & Veterinary Department chuan theihtawpa hma an lak thu ngaihthlak a ni a. Mizoram Sawrkar Flagship programme, Bana Kaih Scheme kaltlangin vawk vulha bultan tum, dilna 2,518 a awm thu tarlan a ni. Ran vulh tura hmalak tumte dilna leh ruahmanna kalpui tum dante uluk taka zirchian thin a nih thu sawi niin Bana Kaih Scheme hnuaia hmalakpui tlak thlanchhuah ten thlamuang taka ran an vulh theih nan ‘Livestock Insurance’ tha neih a pawimawh thu sawi a ni.

Vawiina Insurance Company hrang hrang kalkhawmte hian ‘Livestock Insurance’ an lo kalpui thin tawh dan leh Mizorama vawk ‘Insuarance’ tha taka kalpui a nih theih nana ruahmanna an neih dan tarlanna hun an hmang a. National Insuarance Co. Ltd. tarlan danin kum 2024-25 chhung khan bawng 1,10,000 leh vawk 62,000 vel insurance an lo tih sak tawh a ni. Insurance Company-te hian ‘Livestock Insurance’ tha taka kalpui a nih theih nan ran chhinchhiahna ‘Ear Tag’ neih a tul thu te, vaccine pek ngei a ni tih nemnghehna te leh thuneitute atangin Animal Death Certificate’ thehlut tel a tul thute an tarlang a ni. MSPCC hova Insurance Company-te thutkhawm hnu hian Implementing Department-a Nodal Officer leh Partner Bank-te nen Bana Kaih Scheme hnuaia dilna thenkhat ennawn ngaite ennawnin hun hman chhunzawm a ni.