Hnahthial Post | August 20, 2025, Aizawl: Vawiin khan Chief Minister Pu Lalduhoma chuan a office-ah Mizoram Rubber Society (MIRSO) hruaitute a kawm a. Chief Minister's Rubber Missions 2nd Phase-in a tuam tur chin Hectare 173 a zauh belh an dilna chu a remtihsak.
Pu Hrangzuala, President, MIRSO chuan sorkarin a tirh anga Mamit District chhunga 2nd phase hmanga hmalakna tur khua an tlawh report a pe a. Loneituten CM Rubber Missions hi an tha an ti em em a. An phurin an nghakhlel a. He hmalakna hmanga bul tan ve ngei duh an tam si a. 2nd Phase atana Hectare min pek belh 400 Ha. ah hian kan inkhung leng ngang lo va, a dang 173 Ha. min pek belh leh mai turin kan rawn dil che a ni, tiin an ngenna a thlen a. CM Rubber Missions hmalakna tinrengah rubber chingtute an teltir ve zel avanga lawmthu sawiin, langtlang takin sorkar a kal a, khaw tinte hian tihhlawhtlin kan tum em em vek a ni, a ti.
Chief Minister hian, 2nd phase atana an dil belh Hectare 173 hi pek belh a remti a. A mawhphurtu official pawimawhte pawh a hriattir nghal a ni. Tin, Rubber sawngbawlna khawl za (100), subsidy a pek chhuah tur pawh chak taka bawhzui a nih thu a lo hrilh.
CM Rubber Missions 2nd phase ah hian ram hectare 2400 a zauah hmalak tur a ni a. A zatve Hectare 1200 hi NABARD sum hmanga kalpui a, a zatve dang hi Handholding Scheme atanga kalpui tum a ni. Vawiinah MIRSO dilna anga ram hectare 173 dah belh leh te hi Handholding scheme hnuaia kalpui tur a nih avangin Handholding hian 2nd phase-ah hectares 1373 a zau a huam dawn ta a ni.
Tags
News