Hnahthial Post | August 18, 2025, Aizawl: Vawiin khan Mizoram Board of School Education buatsaih ‘UPSC Grooming Scheme’ chu MBSE Conference Hall-ah School Education Minister Dr. Vanlalthlana’n a tlangzarh. He hunah hian Adviser to Chief Minister (Handholding Policy) Dr. KC Malsawmzauva, Mizoram Youth Commission Chairman Pu Malsawmzuala Ralte bakah Mizoram Education Reforms Committee member te leh sawrkar hotu dangte an tel.
He scheme hi a hming tak chu “A Scheme for Cultivating Early Foundations: Preparing Students for the UPSC Examinations from a Young Age” tih a ni a, UPSC Civil Service Exam-a Mizote tling kan awm chhoh zel nan tun atanga hemi kawnga naupangte chher hriamna atan sawrkarin a duan a ni a, MBSE chu a scheme duang tur leh hemi kawnga hma la chhunzawm tura tih a ni. He scheme hi HSLC Exam pass zo hlim naupang titha zualte tana buatsaih a ni a, Civil Service exam tum, naupang thlanchhuah te chu an kal zel dan tur sawrkarin a ngaihtuahsak ang. UPSC Grooming hi kum tin buatsaih theih beisei a ni a, a scheme hnuaiah hian naupangte chu UPSC Prelims Paper II behchhana exam tira a titha zual te thlanchhuah an ni ang a, interview an paltlang hnuah coaching centre thlan bikah naupangte hi admission tihsak an ni ang. Coaching centre-te nen hian MoU sign a ni ang a, zirtirna mai bakah kaihhruaina tha leh rintlak pe tura beisei an ni. Hemi bakah hian mentoring programme duan a ni bawk a, hetah hian IAS ni lai mekte, retired tawh te leh sorkar hnathawk dangte nen inkawmna hunte leh inkaihhruaina hunte neih thin a ni ang a, an zir chhung zawng chher hriam an ni ang. Heng bakah hian sorkar hnathawh dan leh kalphung te a tak ngeia zirchiana enpui thin an ni dawn bawk a ni.
He scheme hian zir thiamna ringawt ni lovin tun atangin naupangte chu leadership, ethical grounding leh public service lam tuipui turin a buatsaih ang a, sawrkar chuan state tan mai ni lo, India ram tana officer tha leh rintlak chherchhuah a beisei a ni.
Scheme hawngtu Dr. Vanlalthlana chuan zirlai naupang an nih lai atanga Civil Services atana inpuahchahna kalpui hi sawrkarna fawng an chelh hma atanga an vei tawh leh tihhlawhtlin an intiam tawhna a nih thu sawiin a hlawhtlinna kan hmu ta hi a lawmawm hle a ni a ti a. School Education hnuaia peng hrang hrang MBSE, SCERT, Samagra etc. leh Mizoram Youth Commission bakah Finance Department te nena an thawhhona that zarah kan hlawhtling a ni tiin lawmthu a sawi bawk a ni. UPSC Civil Services examinationah hlawhtlinna thangkhatlian dawn kan chang tawh lo hi mi zawng zawngin kan vei niin a hriat a, a chhan tur awm chi hrang hrangte pawh kan inrinsiak thin a.. Zirlai naupang an nih atanga bul tanpui a tula kan hriat vangin hma kan la rawih dawn a, tun hi pilot project a nih avangin Aizawl ami ngei kan han ti phawt a, kumtina hei hi kalpui kan tum avangin kan a huang pawh kan zauh chhoh zel kan inbeisei bawk a ni a ti.
Mizoram Youth Commission Chairman Pu Malsawmzuala Ralte pawhin mizo thalaite UPSC Civil services examination an hlawhtlin theihna tura tun hma atanga MYC in hma an lak dante a sawi a, a kalhmang her rem hrethin hma thar kan la a, hlawhtling ngei turin theihtawp kan chhuah dawn a ni a ti a, thalaite tan teirei peihna leh tumruhna a pawimawh thu sawiin, kan thalaite pawh prtessure na lutuk a kan pek loh te a ngai a, an rilru leh taksa hrisel taka an inbuatsaih theihnan kan thlawp a kan tanpui an ngai hle a ni a ti bawk.
Dr. KC Malsawmzauva, Adviser to Chief Minister (Handholding) pawhin UPSC Grooming Scheme kalpui theih tura hawn a ni ta chu lawmawm a tih thu sawiin a hlawhtlinna kan hmuh ngei ka beisei a ni, tiin duhsakna a hlan a ni.
Tags
News