Hnahthial Post | August 19, 2025, Aizawl: Mizo Photographers’ Society (MPS) te chuan vawiin khan World Photography Day pualin Millenium Centre (Atrium) ah thlalak tha phochhuahna, Photo Exhibition ni hnih awh tur an buatsaih a, he exhibition hi Information & Public Relations Director Pu C. Lalnunkima’n a hawng a ni.
Pu C. Lalnunkima chuan I&PR Department chu photography atan Nodal Department a nih angin a theih ang angin photography hmasawnna atan programme hrang hrangte a buatsaih thin a, mahse hei hian an duh angte chu a phuhru vek lovang tiin a rin thu a sawi a. Chuti chungin MPS-te theihtawp chhuaha photography hmasawn zelna atan an thawhna te chu a fakawm a tih thu a sawi a. Social media te hi photography tel lo chuan thui tak a kal thei lo nia sawiin social media khawvelah pawh photography pawimawhna chu sang telh telh zawk emaw tih mai turin thil a kal nia a hmuh thu te a sawi a. MPS ten Mizoram hmun mawi tak tak an phochhuah thin te hian mipui rilruah nasa takin hna a thawk niin a sawi bawk a ni.
Exhibition hawnna programme hi Pu Zoramchhana, President, MPS in a kaihruai a. He hunah hian MPS ten’a Aizawl khawpui chhunga college zirlaite tan Photo Competition an buatsaih a, a tih tha ber an thlanchhuah te hnenah lawmman semna an nei bawk a ni.
Photo Exhibitionah hian MPS member mi 39 te kutchhuak thlalak mawi 108 phochhuah a ni a, exhibition hian vawiin leh naktuk a awh dawn a. MPS chuan mipuite exhibition chhim turin an sawm bawk a ni.
Mizo Photographers Society hi kum 2012 khan din niin tunah hian Member mi 10 bawr vel an awm mek a ni.
Tags
News