Hnahthial Post | August 15, 2025, Lunglei: India ramin zalenna a hmuh ni, Independence Day vawi 79-na chu vawiin khan Lungleiah urhsun takin lawm a ni a. A lawmna pui ber C. Ṭhuamluaia Muala buatsaihah Home, Urban Development & Poverty Alleviation (UD&PA) leh Department of Personnel & Administrative Reforms (DP&AR) Minister Pu K. Sapdanga chu Khuallian a ni.
Sawrkar Laipui ruahmannaa August ni 2 leh ni 15 inkar chhunga in tina Ram Puanzar (National Flag) zar tur tih a nih angin Lunglei District chhunga sawrkar pisa, hmun pawimawh dang leh mimal inah te India Ram Puanzar zar a ni a. Independence Day ni bikah hian zing dar 9-ah C. Ṭhuamluaia Mualah Khuallianin Ram Puanzar pawt pharhin, Ram Puanzar chibai buktu parade contingent 27 te chibai buk a chhang let a. Independence Day thuchah a sawi nghal.
Khuallian Pu K. Sapdanga chuan Lunglei District mipuite zalenna ni chibai bukin, India ram zalenna atana beitu ram hruaitute hre renga zahna chibai buk thar a, ram tana an hmathlir leh duhthusamte tihlawhtling tur leh India ram tiropui a, tihmasawn zel tura inhlan thar turin a sawm a. Myanmar, Bangladesh leh Manipur aṭanga sahimna zawnga lo tlan lut kan unaute tuamhlawm leh chhawmdawl kawnga Mizoram sawrkar, NGO, kohhran, pawl hrang hrang leh mipuite ṭan rualna chu ropui leh lawmawm a tih thu sawiin, hemi kawnga sum leh pai mamawh leh thil ṭul hrang hrangte chu sawrkar chuan a ngaihtuahin, a bawhzui zel dawn, tih a sawi.
Khuallian chuan Mizoram sawrkar flagship programme, Bana Kaih (Handholding) Scheme thawh khatna (Phase 1)-ah Thlai Thar Market hnuaiah sawrkarin cheng vaibelchhe 142 chuang sengin kut hna thawktute thar sawhthing quintal nuai 3.47 chuang a lei tawh thu sawiin, Lunglei District-ah pawh quintal 27,466.15 lei a nih thu leh support price-ah cheng nuai 987.96 vel sen a nih tur thu a sawi a. CM Special Package hnuaia hmasawnna atana thawhpui (progress partner) tur mi 2,257 leh loan hmanga bana kaih tur mi 646 hnenah ṭanpuina leh loan pek chhuah mek a nih thu sawiin, Lunglei District-ah pawh CM Special Package hnuaiah progress partner 362 leh loan component-ah 48 an awm thu a sawi.
Home Minister Pu K. Sapdanga chuan Lunglei High Powered Committee (HPC) kal tlangin Lunglei District hmasawnna hna hrang hrang thawh a nih bakah, ṭhalaite chawi kanna leh infiamna tihhmasawnna tur hma lakna nasa tak kalpui a nih thu sawiin, Lunglei Municipal Council (LMC) hma laknaa Lunglei chu India ram pum huap khawpui fai inelna, Swachh Survekshan 2024-25-ah ‘Promising Swachh Shehar of Mizoram’-a thlan a ni chu lawmawm a tih thu leh a lawmpui thu a sawi a. Sawrkarin kut hna thawktute ngai pawimawhin, an hamṭhatna tur hrang hrang a ngaihtuah tih sawiin, August 2025 thla tira kut hna thawktute tuamhlawmna, PM-KISAN (kum khata ₹6,000 dawn theihna) 20th Installment (₹2000) sem chu Lunglei District-a kut hna thawktu 15,730-in an dawng tih a sawi.
Khuallian chuan Mizoram mipuite'n damloh nikhuaa inenkawlna ṭha an dawn theih nan Mizoram Universal Health Care Scheme (MUHCS) duan a nih thu sawiin, April 2024 – June 2025 inkar chhungin Lunglei Sr CMO enkawlna hnuaia damdawi in 7 – Haulawng PHC, Chhipphir PHC, Pangzawl PHC, Lungsen PHC, Hrangchalkawn UPHC, Buarpui PHC leh Cherhlun PHC te chu damdawi in ṭha [National Quality Assurance Standards (NQAS) qualified facility]-a puan an nih thu leh Civil Hospital Lunglei chu NQAS bakah, MusQan (naupang lam enkawlna ṭha bik) leh LaQshya (nau neihna hmun ṭha bik)-ah puan a nih thu a tar lang.
Zirna ṭha a awm theih nan zirtirtu training te, sikul building leh bungrua tihchangtlun leh thuam ṭhat te, thiam thil bik zirna (vocational education) lamah te hma lak a nih thu sawiin, Khuallian chuan Lunglei District-ah PM-POSHAN hnuaia chawchhun dawng sikul 441-ah zirlai 20,625 an awm mek thu te, chhan hrang hrang vanga zirna chhunzawm thei lote'n zirna an dawn theih nan Tlabung leh Lungsenah Kasturba Gandhi Balika Vidyalaya (KGBV) din a nih thu leh khaw 8-ah Residential Special Training Centre kalpui a nih thu te, kum 2024-25 chhungin vohbik zirlai 592 hnenah hmanrua leh suma ṭanpuina pek a nih thu leh sikul 36-ah computer zirna ICT Lab dah a nih thu te a sawi.
Khuallian chuan National Social Assistance Programme (NSAP) hnuaiah Lunglei District-ah tar pension la mi 4,965; hmeithai pension la mi 371, rualbanlo/vohbik pension la mi 139 leh family benefit scheme dawng chhungkaw 40 an awm thu leh sawrkarin Ruang Phurh Scheme a kalpui chu Lunglei District-a chhungkaw 53-in an chhawr tawh thu a sawi a. Mahatma Gandhi National Rural Employment Guarantee Act (MGNREGA) hnuaiah Lunglei District-ah Job Card nung lai 20,116 a awm thu leh kum 2024-2025 sawrkar kum chhungin ni 100 inhlawhna siam a nih bakah, hna hrang hrang 2,248 thawh zawh a nih thu te, kum 2025-2026 chhungin ni 37 inhlawhna siam a nih leh tawh thu te, PMAY-G leh Awaas Plus hnuaia in sak ṭanpuinaah in 4,122 sak zawh tawh a nih thu leh sak mek 264 a awm thu te a sawi.
Khuallian chuan FCS&CA Lunglei hnuaiah AAY 2,882 (member 6,485); PHH 24,115 (member 89,897); MSSRP 1,228 (member 4,060); Non-NFSA 13,490 (member 49,700) leh NER Card 17 (member 58) a awm mek thu te, sawrkarin ration card then thianghlim hna a thawh thu leh buk tling ngeia mipuite’n ration buhfai an lak theih nan retailer tinah Digital Weighing Scale hmantir an nih thu a sawi a. Lunglei khawpui tui harsatna tiziaawm turin AMRUT 2.0 hnuaiah Greater Lunglei Water Supply Scheme (GLWSS) tihchangtlun hna cheng nuai 997.78 senga thawh mek a nih bakah, tui pump leh semna hmanrua thuam ṭhatna tur leh tui indaih lohna phuhruk tura GLWSS tihchangtlunna turin SASCI hnuaiah cheng vaibelchhe 55.70 sengin hma lak mek a nih thu a sawi a. Tlawng leh Pialthleng infinna bula tui hna khawlna tur Impounding Dam (Tuikhuah lian) sak mek chu nakkum ṭhalah hman ṭangkai hman beisei a nih thu sawiin, chumi rual chuan tui renchem kawngah te, ruah tui khawl kawngah leh tui hna siam tura ramngaw humhalh leh thing phun uar kawngah te ṭhan harh zel a ṭul thu a sawi.
Home Minister chuan Directorate of Geology & Mining enpuina hnuaiah March ni 17, 2025 khan Mizorama lungalhthei (coal) dap chhuak tura hma lakna (exploration) hmasa ber chu Maheshwari Mining Pvt. Ltd te’n Lunglei District-a West Rotlang khuaah an ṭan tih tar langin, kan ram leilung hausaknate hai chhuak tur leh ramin hma a sawn zel theih nan sawrkar chuan hma a la zel dawn tih a sawi a. Dan leh thupek kenkawhna leh mipuite venhimna atan sawrkar chuan hmanrua leh ralthuamah police-te a thuam chak zel thu leh thawktute pawh lak belh mek zel an nih thu a sawi.
Kum 2024-2025 chhunga District Police te’n cheng nuai 90 chuang hu leh Excise & Narcotics te’n cheng nuai 90 chuang hu zu leh ruihhlo chi hrang hrang an man chu ruihhlovin min luh chilh nasatzia lantirtu a nih thu sawiin, Home Minister chuan ruihhlo chu ṭhalaite suattu leh mahni, chhungkua leh ram tana an nih tur leh tih tur hlen thei lova siamtu a nih avangin ram leh hnam tan ruihhlo laka inthiar fihlim a, do tlat turin ṭhalaite a ngen.
Khuallian chuan District Administration bul tumin "Healthy Lunglei District Campaign" hnuaiah natna inkai chhawn theih loh (non-communicable disease - NCD) chungchang inzirtirna leh endikna ngawrh taka kalpui a nih thu te, mipuite an kawt kaia kal chilh hun - "I Kawtkaiah Sawrkar" te, vohbikte chawi kanna atana hma lakna - "Project LEAP" te, Lungsen Aspirational Block-a nu leh naupang hriselna atana hma lakna - "Project BLOOM" te, thingtlang sikul naupangte’n English bulṭhut an thiamna tura hma lakna - "English Literacy Programme" leh sawrkar scheme hrang hrang hnuaia hma laknate ṭha taka kalpui ṭhin a nih thu te a sawi a. Sawrkar department hrang hrangte'n sawrkar ruahmanna angin mipuite hmasawnna atan theih tawp an chhuah tih sawiin, August 2024 – July 2025 inkar chhungin Lungleia sawrkar department hrang hrangte’n District Treasury kal tlangin State Consolidated Fund-ah sum cheng vaibelchhe 1,110.80 an chhun luh thu a sawi.
[NB: Khuallian thu sawi kimchang chu link-ah hian en theih a ni a.]
Khuallianin thu a sawi zawh hian ceremonial parade lawmman bakah, chawimawina leh lawmman dang sem zui nghal a ni a. Ceremonial parade-ah hian armed contingent 4, unarmed contingent 9, school contingent 11 leh pipe band 3 an awm a. Pu R. Remliana [Deputy Superintendent of Police (Proby)] chu Parade Commander niin, Pu R. Lalremliana (Sub-Inspector, Lunglei DEF) chu 2nd Parade Commander a ni a. Parade commander-te bakah, unarmed leh school contingent pathumna chin lawmman pek niin, band party 3, armed contingent 4 leh parade contingent dang 8 chu participation prize pek an ni bawk.
Independence Day 2025 ceremonial parade-a ti ṭha lawmman dawngtute chu:
A. Unarmed contingent:
(1) Pakhatna - NCC Army, Baptist HSS, Serkawn, Lunglei
(2) Pahnihna - NCC, Govt HSS, Lunglei
(3) Pathumna - NCC, Lunglei Government College
B. School contingent:
(1) Pakhatna - 2nd Bn MAP English Medium School, Luangmual, Lunglei
(2) Pahnihna - JNM Model Middle School, Electric Veng, Lunglei
(3) Pathumna - Christian Education Centre, Lunglei
Ceremonial parade lawmman bakah hian Independence Day 2025 pualin a hnuaia mi ang hian chawimawina leh lawmman hrang hrang sem a ni bawk a. Khuallian Pu K. Sapdanga chuan a dawngtute kutah a hlan hlawm a ni.
A. Chawimawina leh Lawmpuina:
1. Assistant Sub-Inspector Zothansanga, Lunglei DEF - Governor's Gold Medal
2. Assistant Sub-Inspector Lalṭhabuanga, Lunglei DEF - Governor's Silver Medal
3. Pu C. Lalnunpuia (Venglai Lunglei) - Birmingham, Albama, USA-a World Police & Fire Games, 2025-ah inkut elh (arm wrestling) kg 110 huangah Indian Police ai awhin Gold Medal leh Silver Medal a la.
B. STOP Diarrhoea Campaign 2025 - Poster/Flyer Making Competition (kawṭhalo um bo beihpui thlak - lemthuziak insiamsiak):
(1) Pakhatna - K. Lalchamliana, Pawl 9, Government High School, Zotlang
(2) Pahnihna - TBC Lalhruaipuia, Pawl 9, Government High School, Zohnuai
(3) Pathumna - Lalrambeiseia, Pawl 9, Government High School, Zotlang
C. Independence Day 2025 puala Celebration Committee hriatpui tournament hrang hrang lawmmante:
1. Tennis:
(1) Sub-Junior:
Champion - Joel Lalfelkima, Bazarveng
Runner-up - Lalrindika, Farm Veng
(2) Junior:
Champion - C. Lalrawngbawla, Bazarveng
Runner-up - Jimmy Lalrinchhana, Chanmari
(3) Men's Doubles:
Champion - C. Lalrawngbawla & K. Lalrinawma
Runner-up - Nelson Lalthanpuia & R. Lalzuiliana
(4) Ladies' Singles:
Champion - Lalrinsiami Sailo, Chanmari
Runner-up - Sandhya Giri, Electric Veng
(5) Men's Singles:
Champion - Albert Lalrinpuia, College Veng
Runner-up - Lalropuia, College Veng
2. Arm Wrestling:
Champion of Champions - Joseph R. Lalruatdika, Electric Veng
Vawiina Lungleia Independence Day lawmnaah hian Khuallian, Minister Pu K. Sapdanga hi a nupui Pi Darkhumi'n a ṭawiawm a. He hunah hian Lunglei High Powered Committee Vice Chairman & Lunglei North bialtu MLA Pu V. Malsawmtluanga, Lunglei South bialtu MLA Pu Lalramliana Papuia, Lunglei West bialtu MLA Pu T. Lalhlimpuia, UD&PA Secretary Pu Lalmalsawma Pachuau, Lunglei Bawrhsap Pi Navneet Mann leh Lunglei SP Pu J. Lalmuankima te bakah, Lunglei Municipal Council Chairman Pu Lalzuithanga leh councillor-te, sawrkar official-te, ex-servicemen-te, tlawmngai pawl, kohhran leh political party hruaitute, thu thar theh darhtute leh zirlai naupangte, lawmman dawngtute leh mipui ṭhahnem tak an tel a. Muala hun hman zawh hian chhun lamah Circuit House, Lungleiah sawm bikte tan Khuallian hova inkawm hona, 'At Home' programme buatsaih niin, thingpui ruai kil ho a ni.
Kumin Independence Day lawmna pual hian Lunglei District Independence Day Celebration Committee chuan Civil Hospital Lunglei, Christian Hospital Serkawn, District Jail, Observation Home (Pukpui), Special Home (Pukpui), Bethel Centre (Chhumliamkawn, Sazaikawn), Kawlkhuma Boys Home (Chanmari), WADA TRC (Chanmari), Lunglei Home TNT Theiriat, Rescue Centre (Kawmzawl, Pukpui), Beiseina In (Kawmzawl, Pukpui), Baptist Church Orphanage (Ramzotlang, Serkawn) leh Chhawmdawlna In (Melte, Serkawn)-ah te ṭanpuina thilpek hlanin, thilpekah hian pawisa fai ₹40,000 sem chhuah a ni.
Independence Day 2025 puala 'Har Ghar Tiranga' Campaign kalpuiah August ni 13, 2025 khan Lungleiah hian Ram Puanzar nena kawng zawh, 'Tiranga Rally' chu sikul naupangte nen buatsaih niin, Lunglei, Lungsen, Tlabung leh Bunghmun khaw chhung hmun langsar laiahte India Ram Puanzar leh a kaihhnawih thuziak leh lemziak chi hrang hrang tar a ni a. Lunglei khawpui chhunga sikul thlan bik 4 - PM SHRI Govt Model Primary School (Electric Veng), Govt Middle School-I (Pukpui), Govt High School (Chanmari) leh Govt Leitlangpui Higher Secondary School te chu sikul bang leh a chhehvel Ram Puanzar rawnga chei a ni bawk.
Tags
News