Hnahthial Post | August 6, 2025, Lunglei: National Highway-54 Bualte leh Ṭhualṭhu inkara lei minin kawng a tihpin avanga harsatna thleng mek chungchangah vawiin khan Lunglei District Disaster Management Authority (DDMA) Chairman, District Bawrhsap Pi Navneet Mann chuan heti ang hian hriattirna a chhuah.
"Bualte leh Ṭhualṭhu lei min avangin khualzin tam takte'n harsatna an tawk mek a. Lei minna hmun hi Ni 04.08.2025 tlai lam khan motor te (LMV) kal tlang theih tura then fai niin, khualzin tangkhangte zingah motor te (LMV) tam zawk chu kal tlangtir an ni. Lei min then fai hna hi thawh mek zel a nih lai leh kawng an laih tlang zawh hnu lawk Ni 05.08.2025 chawhma lam khan lei minna hmunah hian nasa taka lei min a awm belh avangin kawng a hnawh ping leh a; then fai hna ngawrh taka thawh chhunzawm zel ni mah se, ruah a tlak chhunzawm reng avangin kawng hi laih tlang theih a la ni lo a ni.
"He lai lei min avanga khualzin tam tak an tang leh mi tam takin harsatna an tawk hi District Administration chuan pawi a ti tak zet a, kawng tlang tur hian theih tawpa hna thawh chhunzawm zel a ni ang.
"Lei minna hmun hi laih tlang a nih hunah pawh lei min belh theihna lai a la tam hle a; fur lai a nih avangin then fai hna a chak thei lo a; hna thawktute himna tur leh chhiatna dang thleng thei laka inven tel a ngaih avangin fimkhur a ngai hle a ni. Heti ang hi Bualte leh Ṭhualṭhu kawngpui dinhmun a nih rih avangin helai kawng hi khualzin turte tan zawh a him rih lo tih kan inhriattir a. Lunglei piah lam Lawngtlai/Siaha District mite leh district dang aṭanga Lunglei piah lam kal tumte tan Sangau kawng lama kal rih turin kan inngenin, kan inhriattir a. Kawng hi khualzinte tana zawh him turin hma lak chhunzawm mek zel a ni tih kan inhriattir bawk e."
Tags
News