Hnahthial Post | August 19, 2025, Aizawl: WORLD PHOTOGRAPHY DAY vawi 186-na puala ah Mizoram School of Photography leh Photography Club of Mizoram tangkawpin an buatsaih Photo Art Exhibition & Competition vawi 9-na chu vawiin khan Archives Hall, Babutlang chu Pi Baryl Vanneihsangi, MLA in a hawng.
Khuallian Pi Baryl Vanneihsangi chuan kalkhawmte hnenah thu sawiin, thlalak hmangin hun pawimawh leh nî chhinchhiahtlak te lak niin, Mizo culture leh history te vawnthat saktu an ni a, kan hriatrengna a hunlai ang mai a min ngaihtuah let tir thei tu an nih avangin thlala thiam te an hlu hle a ni. Hun inher zelah Photojournalist tha tak neih a hun tawh hle a, a thiam leh tui mite pawh Photojournalist puitling ni tura inchherhriam turin a sawm bawk. Mizoram School Of Photography te’n thlala thiam te hobby piaha eizawnna tlaka an chher chhuak thin chu lawmawm a tih thu a sawi bawk.
He Photo Exhibition hian ni 5 chhung a awh ang a, August ni 23, Inrinni ah khar a ni ang.
Exhibition Chairman Pu Malsawmtluanga, MSP & PCOM din tu chuan report pe in he Photo Exhibition & Competition hi aduh apiang tana tel theih niin Thupui thlan bik a awmlo a, thlalak 108 a lut a, mi 49 telin, vawiin hian Result puan nghal a ni. Kum 2017 atang khan kumtin Photo Exhibition & Competition hi anmahni sum sengin Club member ten pawisa an thawhkhawm leh Entry fee lut atanga buatsaih thin niin, Mizote’n Photography pawimawh zia inzirtir nan te, kan ram thing leh mau, nungchate humhalh an tul ziate, faina leh thianghlimna kawnga inzirtirna tha tak anih zia leh mipui kan zirtir theih nan Photo exhibition hi buatsaih thin a ni. Photography Competition hi Photography a thiamna hrang hrang neiten an endik thin a, dik leh uluk thei ang bera endik thin a ni. National leh International level thlenga tel thin an awm chho zel a, hei hi hetiang kan buatsaih thin rahchhuah niin kan ngai.
MSP Gold Award, Mama Ralte – RepublicVengthlang–
Rs.10000+Trophy+Certificate.
MSP Silver Award, Lalbiakzama – Dam Veng – Rs. 7000+Trophy+Certificate.
MSP Bronze Award, Lalawmpuia – Model Veng – Rs. 5000+Trophy+Certificate
Honourable Mention Award mi 5 hnenah Rs. 1000+Trophy+Certificate pek an ni bawk.
Exhibition ah hian RUNMAWI TV chu Media Partner an ni. Mizoram School of Photography hi kum 2017 khan din niin National Academy of Photography, Kolkata recognized a ni a, MSP atanga chhuak te hian Photography Club of Mizoram (PCOM) dinin, he Photography Club hi Federation of Indian Photography (FIP)hnuai ah an in Affiliate a ni.
Tags
News