Hnahthial Post | September 16, 2025, Khawzawl: Vawiin khan Pu Lalduhoma Chief Minister chuan Tualpui khaw lo zawhpui a telpui a, Association of Tour Operators Mizoram (ATOM), Tourism Department leh Agriculture Department tangkawp ten Agro Tourism chawikan nan Lo Zawhpui hi an buaitsaih a, Champhai North bialtu MLA Er. H. Ginzalala chu Lo Zawh thlengtu niin Director Tourism Department Pi Lalrodingi'n hun a kaihruai a ni.
Chief Minister Pu Lalduhoma chuan thusawiin Tualpui khua hi pi leh pu te atang mi taima hnathawh ngaisang khua khaw dangte'n pur an chawkna a ni a, vawiin ni thlengin chhawm nungin a la awm zel hi lawmawm a tih thu a sawi. Sorkarin kut hnathawktute a ngaisang a, a zah a, an kut hnathawh rahte a lawmpui a, malsawmna dawng zel se a duhsak avangin Sorkar Department buatsaihin hman a lo ni thei ta hi lawmawm a tih thu a sawi a. Thingtlang lo neih hi bansan thut theih a ni lo a, zawi zawia kalsan a nih theihna turin Sorkarin hma a la mek zel a ni a ti a. Tualpui leh Champhai inkar kawng hi Nesids Road hnuaiah laih tur a ni a, hei hian kan economy nasa takin a tih pui beisei a ni a, Lo zawh hi Tourism anga kalpuia khualzin tam zawk khaw dangah hip thei tura ruahhmanna kalpui mek a ni bawk a, Tualpui khua in ramngaw a neih that vangin Model village atana thlan hial a ni a, a thawktu tur company nen pawh inremna thuthlung pei fel thawkhat tawh a ni. Hei hian khualzin te hip thei turin hmasawnna tam tak a keng tel dawn a, nasa taka cheibawl tur ruahmanna siam a ni a, khawtual mipui te pawhin khualzin te dawngsang thei tura hawihhawmna te neia mi pan chak ni tur hmanlai thil hlui humhalhna kawng tan la sauh sauh turin turin a chah bawk a ni.
Champhai North bialtu MLA Er. H. Ginzalala, Lo Zawh thlengtu chuan kan pi leh puten lo zawh runpui an lo neih thin chhunzawma a awm chu a lawm awm hle a, tourism nena kal kawp thei tura ruahmanna a awm chu lawmawm a tih thu a sawi. Ram pawn mite paw'n an hre thar nasa hle a, hei hi lo neitute tihchakna bakah zin mi te hipna hmanraw pawimawh tak a ni a, chawm nun zela tun aia changtlung zawk kalpui a nih theihna turin taima taka hna thawka, ngaihtuahna zau zawk nei turin kalkhawm te a sawm a ni.
He hunah hian hian Dr. Vanlalthlana Education Minister, Pu Lalthansanga Forest Minister, Pu Lalmuanpuia Punte Adviser to CM (Political), Pu Vanlalthiana DC Khawzawl te pawhin thu an sawi a ni.
Vawiina Tualpui Lo Zawhpui ah hian Sorkar Department Officials, Aizawl, Khawzawl, Champhai leh Party hruaituten an telpui a ni.
Tags
News