Mizo Inneih leh Rokhawmna dan ennawntu Review Committee an thukhawm

Hnahthial Post | Sept 3, 2026, Aizawl: Vawiin khan Mizo Inneih leh Rokhawmna dan ennawntu Review Committee chu an Chairman Pu Zahmingthanga Ralte, Law & Judicial Department-a Addl. Secretary ni bawk hovin Secretariat Conference Hall-ah an thukhawm a. Thildang bakah ‘Mantang’ sem dan Mizo pi leh pute lo kalpui thinte leh tun hnua kan kalpui dan dik hlel deuh nia langte siam that dan tur an ngaihtuahho a ni.

Pu Zahmingthanga Ralte chuan Review Committee Member-te chu Mizo chhungkaw tin khawih thil ngaihtuah an nih avangin, uluk taka an ngaihtuahnate hmang tura ngenin, The Mizo Marriage Inheritance of Property Act, 2014 chu Mizo-te tan bik chauh a siam ‘Mizo Personal Law’ a ni a, ram dang mite bakah kan Indian pui ngei hnam dang leh sakhaw dangte tan pawh a duan a ni lo tih sawiin, anni pawhin Personal Law an nei hrang theuh zawk a ni tih hre turin Mizo mipuite a chah bawk a ni.

Chairman kaltlang hian Committee chuan, kumin Mizoram Assembly Budget Session-a Mizo Inneihna leh Rokhawmna Dan siam that ‘The Mizo Marriage & Inheritance of Property (Amendment) Act, 2026’ angin Kohhran hrang hrangten Inneihna Certificate an pek chhuahah ‘Divorce’ tih thumal chu ‘In accordance with the Mizo Marriage & Inheritance of Property Act, 2014’ tia thlak vek turin Kohhran hruaitute a chah a.

Kohhranten anmahni huang chhungah inneihna thiah leh inneih leh phalna pek dan an neih chungchangah he Dan hi inrawlh lo mahse, he Dan siamthat vang leh Ram Dan-in a phut angin ‘Nupui pasal then tawhin mi dang neih leh an duh chuan inneihtir hmain court atangin an nupui pasal hmasa an then tih lantirna (Divorce Certificate) an nei ngei tur a ni a, chutiang nei lova midang nei leh chu kum 7 emaw a thua zirin kum 10 thleng pawh lungin tan tira hrem theih an ni dawn tih sawiin nupui/pasal dang neih tum leh inneihna buatsaih tute pawh fimkhur turin a chah nghal a ni. (Assembly-in Dan a siam thatah hian nupui/pasal nei leh tur ten Divorce Certificate an nei em tih hriat chu Inneihtirtu mawhphurhnaah a dah a ni).

Vawiina thukhawm hian Man leh Mual inhlannaa Thian man leh Nuta man bakah Nu man chungchang pawh ngaihtuah nghalin, Thian man chu mi nawlpuiin inneihna kan kalpui mek dante thlir chung leh Perry Sap Dan (A monograph on Lushai Customs & Ceremonies)-ah te, Mizo Hnam Dan 2006-ah te a lo lan tawh avangin, huam zau zawk a telh chhunzawm an rawt dawn tih a sawi a, Nuta man erawh chu hman ngai loh thil leh chin thar mai nia a lan avangin ching chhunzawn lo hram turin Mizo mipuite a ngen a. Hei bakah hian Nu man chu hringtu nu chauhvin a ei tur, chupawh man dawngtu a nih loh emaw pasal nei tur-i pa nen an awm hran chauhva a ei tur a ni a, midangin Nu man an ei thei lo, a ti bawk.

He hunah hian Mizoram Bar Association (MBA) President Pu R. Lalremruata pawhin Supreme Court in non-tribal fa hrin, tribal zinga khawsa, anmahni pawh inti hrang lo, khawtlangin an mi leh sa anga an pawm theih te tribal hamthatna pek theih dan a rel tawh leh Mizoram Sawrkarin a kalpui dan a sawifiah nghal bawk.

Vawiin thutkhawmah hian Sawrkar aiawhin Law & Judicial Department leh DIPR mi leh sate bakah Kohhran leh tlawmngai pawl aiawh: Council of Churches in Mizoram (CCM)-te, MHIP General Hqrs. leh MUP Hqrs. aiawh te bakah Women Commission Chairman leh Mizoram BAR Association President te, MZU mithiamte leh helam a tui mi sawm bik engemaw zat an tel a ni.