Education Minister Dr Vanlalthlana'n Hnahthiala High School-te hnenah Science Lab Equipment hlan

Hnahthial Post | October 11, 2025, Hnahthial: Nimin (10 October) khan Horeb Conference Hall, Hnahthial-ah Dr. Vanlalthlana, School Education Minister chuan Hnahthial District chhung school pasarih (7) hnenah Science lab bungrua a hlan a. Zoram zirna hmasawn nan sawrkar chuan theihtawp a chhuah thu a sawi.

School Education Minister chuan School exam centre hrang hrangah lab equipment sem a ni chu lawmawm a tih thu sawiin sikul tin ten hmasawn nan an hman ngei a besei thu a sawi a. Tunlai thiamna, satellite communication hmangin zirna hmun kilkhawr ber berah pawh, Mizoram pum huap angin online hmanga zirtirna tha tak nei thei tura ruahmanna siam mek a nih thu tarlangin chumi tur atan chuan computer leh printer pawh school tam thei ang berah dah belh zel an tum thu a sawi a. Technology changkang mai ni lovin lehkha kan zirtir dan pawh tih changkan chhoh zel an tum thu a sawi bawk.

Minister chuan Mizoram pum huapin common question siam an tum tawh thu tarlangin chumi avang chuan syllabus omit mai mai te a theih tawh dawn loh thu a sawi a. Zirtirtute pawh an intuaihriam thar a tul tawh tur thu sawiin Mizo zirlaite chu India ram pum huapa inelna eng pawh hmachhawn thei tura chher chhuah an tum thu a sawi a ni.

Zirlaite chu lehkha zir lam an tui zawng a nih loh pawn skill development lamah kal turin a chah a. Skill neih that chuan eng kawngah pawh enzawnna a awm mai ni lovin midang awh khawpa hlawhtlinna a awm a ni a ti a. Mizoram chu product export-ah chhe mah ila Human Resource-ah kan san thu tarlangin chu chu hmang tangkai thiam turin mitinte chu a chah nghal a ni.

Science Lab Equipment-te hi Govt. Hnahthial High School, Govt. Southern High School, Govt. Thingsai High School, Govt. Cherhlun High School, Govt. South Vanlaiphai High School, Govt. Pangzawl High School leh Govt. Chhipphir High School-te hnenah hlan an ni.

He programme hi Pu Micky R Lalenkawla, DEO/DPC, Samagra Shiksha chuan kaihruaiin Pu S. Lalthanzuala, SDEO chuan lawmna thu a sawi a. Pu PC Lalngaizuala, Deputy Director, School Education Dept chuan thusawina hun neiin Pu Chalnghaka, Thiltlang Govt. HS Headmaster chuan lawmthu sawiin hun a khar a ni.