MSU Conference Hnahthial | "Zirna kalphung chu thawk leh khatah thlak thut theih thil ni lo mah se zawi muangin a tha zawngin danglamna kan siam mek zel a ni"

Hnahthial Post | October 11, 2025, Hnahthial: Nizan (10 October) khan Mizo Students' Union General Conference vawi 23-na, Hnahthial District-a thleng chuan 'Palai Thlah Programme' nen kharna hun an hmang a, School Education Minister, Dr. Vanlalthlana chuan khuallian niin a hmanpui. Zirna kalphung chu thawk leh khatah thlak thut theih thil ni lo mah se zawi muangin a tha zawngin danglamna kan siam mek zel a ni a ti. Bialtu MLA, Pu Jeje Lalpekhlua chuan Uaptu nihna nen zanin Conference kharna hi a hmanpui bawk a ni.

Khuallian chu zirlai lehkha thiam tak tak ten an chanvo tur an chang lo thin chu a tawrhpui thu sawiin chuvang chuan zirtirtu hna lakah pawh fair takin, advertisement tel ngeiin qualified leh thiam tak tak chauh an lak tawh thin thu a sawi a. Zirtirtu lak turte pawh lehkha thiam ringawt ni lova zirlaite zirtir thiam an nih ngei theih nan an exam-na ah Practical Teaching an tih tel zel tawh thu sawiin dan ang tak leh fair takin Samagra Shiksha hnuaiah zirtirtu, instructor leh a dang dang mi 1700 chuang la tawhin chu mai bakah casual teacher 1400 chuang an lak tawh thu a sawi bawk.

Tun hnaiah College zirtirtu tur mi 32 la turin an inbuatsaih mek thu sawiin Lungleia Engineering College lo sak tawh, hman tlak lohva dah chu nakkum academic session-a hman theih turin tan an lak thu a sawi a. Chutah pawh chuan a thawktu tur post siam fel ni tawhin lak theih tura ruahmanna siam a nih tawh thu a sawi bawk.

Sawrkar Laipui lamin a rawn ngiat angin State University pangngai tak, Mizoram chhunga college zawng zawng rawn in affiliate-na tur duan an tum thu a sawi a. Chuta zir tur course-te pawh siam fel tawh niin khawvel el phak zirna leh zirlai chher chhuah an tum thu a sawi a ni.

Zirlaite hnenah fuihna thuchah sawiin mahni nuam tih chin bakah risk la ngam turin a fuih a. Engkim hian sacrifice a neih thu sawiin thil ropui deuh tih a, hlawhtlinna sang tak kan chan duh chuan chutiang mil chuan ka nunah sacrifice kan neih a tul a ni tiin zirlaite chu awmze neia risk la ngam turin a chah a ni.

Khual zahawm, Pu Jeje Lalpekhlua chuan thu sawina hun tawi hmangin rinawmna, tumruhna, hawihhawmna te leh Mizo nun zemawi chu tuna zirlai thangtharte hian rawn chhawm nung zel turin a ngen a ni.

He hun hi Lalramparmawia, MSU Treasure chu kaihruaiin MSU President, B. Lalkhawngaihzuala hnen atangin thusawi ngaihthlak a ni a. Zaithiam leh lammi ten kalkhawmte chu awiin Organizing Chairman, B. Lalremsanga chuan Palai thlahna leh lawmthu sawina nen MSU General Conference vawi 23-na chu a khar a ni.