MSU Conference Hnahthial | "Mizoram chhunga hna awm ngeiah pawh kan tling thei lo thin chu zirlaite kan tan a tulzia tilangtu a ni"

Hnahthial Post | October 10, 2025, Hnahthial: Mizo Students' Union General Conference vawi 23-na Vantlang Inkhawm hnuhnung berah Chief Minister, Pu Lalduhoma chu khuallian niin Mizote, Mizoram chhunga hna awm ngeiah pawh kan tling thei lo thin chu zirlaite kan tan a tulzia tilangtu a nih thu a sawi. Lok Sabha MP, Pu Richard Vanlalhmangaiha chu he hunah hian khual zahawm niin Bialtu MLA, Pu Jeje Lalpekhlua chu Uaptu-ah atang a ni.

CM chuan sawrkarin kan ram hma hun, zirlaite a ngaih pawimawh em avangin he conference hi rawn chhim a nih thu a sawi a. Zirlaite'n study tour an mamawh thinna te chu hriain nakum budget-ah chuan study tour neihna tur atan budget an dah belh tur thu a sawi a, scholarship pawh central Ministry lamin sum an peih fel veleh an rawn pek chhuah nghal thu a sawi bawk. MSU te chu tun hnaia zirtirtu qualify lo chhawr chhunzawm chungchang te, advertisement tel lova hna lak chungchang an do te chu fakawm a tiin sawrkar khalh ngiltu pawimawh tak ni zel turin a chah a. Kalphung tharah chuan direct-a hna lak tur reng reng chu advertisement tel lova lak an nih tawh loh tur thu leh chung hmanga an hna lak reng reng chu regularize theih vek an nih tawh tur thu a sawi bawk.

Zirlaite chu midang sawi ngawt ring lovin sawrkar hmalakna te chu a that leh that loh mahni a zir chiang zel turin a chah a, chutih rual chuan sawrkar hnuaia hamthatna tam takte pawh zirchiang turin a chah nghal a ni. Mizoramah Central-in school tha tak tak a rawn din - EMRS leh JNV ah te in enroll nachang hre turin zirlaite chu a hrilh a, Mizorama kan neih chhun, Chhingchhipa Sainik School pawh seat ruak a la tam thu leh Mizo ten kan luah khah loh chuan hnam dang ta tur a ni ringawt dawn a ni a ti bawk.

Hna awmlo kan tih laiin tun hnai mai, BSF lak runpuiah Mizo thalai intlar tur pawh kan awm mang lo chu pawi a tih thu a sawi a, Mizoram chhung ngeia ERMS, MRB leh a dang hrang hrang hnuaia Mizo kan tling tha thei ta lo chu thil ngaihmawhawm tak, Mizo zirlaite leh thalaite kan tan a tul tawh zia tilangtu a nih thu a sawi bawk.

Zirlaite chu hna an zawn kawngah sawrkar hna mai piah lam, Entrepreneurship ah te rilru seng turin a fuih a. Tun sawrkar chuan entrepreneur te tan Handholding Scheme chuan hun tha a rawn hawn thu sawiin, he scheme hi pung tel lova loan lakna a nih thu a sawi a. He Handholding scheme bakah central scheme tha tak tak, UNNATI kan tihte hmang hian tourist ho hipna tur ruahmanna siamin, tuna rail kawng rawn lut hi hmang tangkai thei tura rilru seng turin thalaite chu a sawm nghal a ni.

CM chuan Hnahthial District-in an mamawh em em, 132 kV line leh a chhehvel tih puitlin nan tun sawrkar chuan cheng vbc 285 an dah thu sawiin chu chu 10% Gross Budgetary Support (GBS) atanga sum rawn kal tur a nih thu a sawi a. Sum rawn kalna tur hi Central lam atang a nih avangin tihfel mai theih a la ni lova, Hnahthial mipuite chu lo dawhthei hram hram turin a ngen nghal a ni. Darzo lui kaiah 2400MW hydro power generate-na tur bik, tui khuap an tum thu sawiin chu chuan power lama harsatna awm thin chu a sutkiang a rin thu a sawi.

Mizoram Engineering College, Lungleia awm chu nakum academic year atanga hman tlaka siam hman turin a thuam that nan cheng nuai 2541.19 dah a nih tawh thu leh chuta thawk tur hna post 63 lakna tur chu an pawm tawh thu a tarlang bawk a ni.

Sawhthing man pawh release fel a nih tawh thu sawiin a dawng turten an dawn tep tawh thu a sawi a. Mi rinawm loh an lo awm thin avangin a dawng turte an thlan uluk thu a sawi bawk.

Thalaite run mek tu Ruihhlo do nan hmalakna hrang hrang - Operation Jericho leh Hulhliap Short Stay te chu duan niin Nasha Mukt Bharat Abhiyaan hnuaiah pawh hmalakna hrang hrang kalpui mek a nih thu a tarlang nghal a ni.

Khual zahawm, Pu Richard Vanlalhmangaiha chuan tun sawrkarin zirlaite zirna a ngaih pawimawh avangin theihtawp an chhuah hnuah Scholarship pek chhuah a ni thei ta chu lawmawm a tih thu a sawi a. Zirlai hruaitute hnenah fuihna thuchah sawi chhunzawmin Political Party thuhnuaiah awm lova, zirlaite leh Mizoram hmakhaw ngai chunga hma la zel turin a fuih a ni. Chutih rual chuan Mizoram chauh ni lo, state dangah kan inpharh zau a tul tawh thu sawiin IAS, IFS leh central service dang kan tlin lo a nih pawhin central hna dang a tam thu leh chung chu Zoram thalaite'n exam ve thin se a duh thu a sawi a ni.

MSU Vantlang inkhawm program hi Pu Zodinsanga, MSU General Secretary chuan kaihruaiin MSU President, Pu B. Lalkhawngaihzuala chuan thu sawina hun a hmang bawk a ni.