Rashtriya Poshan Maah 2025 kharna leh Integrated Child Development Scheme kum 50 tlin lawmna hun hmang

Hnahthial Post | October 16, 2025, Aizawl: Vawiin khan Directorate of Women & Child Development chuan Aijal Club Park-ah Rashtriya Poshan Maah (National Nutrition Month), 2025 kharna leh Integrated Child Development Scheme (ICDS) kum 50 tlin lawmna hun an hmang a. He hunah hian Pu V.L. Zaithanzama, Member of Mizoram Legislative Assembly chu khuallian niin, Khuallian hian RASHTRIYA POSHAN MAAH 2025 hmang tha zual District-te hnenah lawmman a hlan nghal bawk a ni.

He hunah hian khuallian Pu V.L. Zaithanzama, Member of Mizoram Legislative Assembly chuan thu sawiin Poshan Maah-in a thupui ken tel hrang hrangte uar taka inzirtir kawnga a kaihhnawih Department-te hmalakna chu lawmawm a tih thu a sawi a. Department-te chu theihtawpa tan la chhunzawm zel turin a fuih nghal bawk a. Khuallian chuan ICDS kum 50 tlin lawmpuina thusawiin, hriselna kawnga Mizoram tana ICDS hnathawh chu lawmawm a tih thu a sawi a. a thawk tawhte leh la thawk mekte thawhrimna chu fakawm a tih thu sawiin, ICDS –a thawktute chu theihtawpa tang zel turin a fuih bawk a ni.

Rashtriya Poshan Maah pual hian Khual zahawm Pu Udit Prakash Rai, Commissioner & Secretary, Cooperation Department chuan Aizawl Urban ICDS Project leh Tlangnuam ICDS Project hnuaia mi 10 hnenah naupang Anganwadi Centre kal ṭha leh kal chhuakte hnenah lawmpuina Vidhyarambn Certificate a hlan a. District level leh ICDS project level-a titha zualte hnenah lawmman sem nghal niin, Pi Lalzarmawii IAS, Commissioner & Secretary SWW&CD chuan ICDS Project Level Award hi a hlan a ni.

Rashtriya Poshan Maah 2025 pual hian thupui chi hrang hrang ngaihpawimawh bik (theme) thlanchhuah a nai a. Chungte chu:

I Mawm (oil), Thlum(sugar) leh Al(salt) eitlem tura in zirtir.

i) Nupui Fanau te hriselna atan a mipa/pa ber mawhphurhna pawimawhzia in zirtir.

ii) ECCE / ‘Zirtir la, Eitur tha pe rawh’- tih thupui hmanga zirtirna pek

iii) Tree Plantation

iv) Nu hnute tui pawimawhna inzirtirte an ni.

Heng thupuite behchhan hian District level-a Poshan Mah 2025 hmang tha leh ICDS kum 50 tlin lawmna puala intihsiakna te buatsaih a ni a. District level-a hmang tha zual lawmman semah, Siaha District chuan pakhatna lawmman dawngin, Serchhip District leh Kolasib District-ten pahnihna leh pathumna dinhmun an hauh va. ICDS PROJECT LEVEL AWARD semah, West Phaileng ICDS Project chuan lawmman pakhatna dawngin, Bilkhawthlir ICDS Project leh Thingsulthliah ICDS Project-ten an dawt a ni.

Vawiin vek, chawhnu lamah khan ICDS Kum 50 tlinna lawm chhunzawm nghal a ni a. Hemi pual hian Pi Zoramthangi Chhangte, Director Women & Child Development chuan ICDS chungchang sawi zauin, Mizoram Anganwadi Reporting Tools (MART) Mizoram puma Anganwadi hrang hrang bakah Project Hrang hrangin Data dahthatna leh lakkhawmna atana an hman tur software chu a tlangzarh nghal a ni.

Rashtriya Poshan Mah 2025 kharna pual hun hman hi Pi Lalzarmawii, Commissioner & Secretary SW,W&CD chuan kaihruaiin, kalkhawmte lawmna leh Rashtriya Poshan Maah hmandan thin tlangpuite a sawizau va. Pi Zoramthangi Chhangte, Director Women & Child Development hnen atangin thusawi ngaihthlak a ni a. Dr. Lalhruaitluangi Chhangte, Deputy Director (ICDS) chuan a lem nena entirin, Poshan Maah 2025 thlirletna hun a hmang a. Pi Sailopari, Joint Director Women & Child Development chuan lawmthu sawiin hun hi a khar a ni.