Zirlaite leh hna zawng mekte puitu 'Success AI Career Guidance' leh AI Personalised Learning App 'LushAIEdu PLS' a tlangzarh

Hnahthial Post | October 16, 2025, Aizawl: Mizoram sawrkar leh LushAITech te tangkawpin an buatsaih, Mizoram Legislative Assembly Member-te tana Artificial Intelligence (AI) chungchang zir hona, Assembly Conference Hall-a neih mekah, Information & Communication Technology Minister Dr. Vanlalthlana chuan, zirlaite zirna kawnga pui theitu tur AI Application ‘LushAIEdu LPS’ leh hna zawng mekte tana pui theitu tur ‘Success AI Career Guidance’ te a tlangzarh.

ICT Minister chuan LushAIEdu LPS leh Succees, AI Career Guidance te chu zirlaite leh hna zawng mekte tan a tangkai tur thu sawiin, zirna subject hrang hrang leh exam hrang hrang an inbuatsaihna kawnga pui theitu tur a nih thu a sawi a; Mizorama AI tih hmasawnna atana sawrkar hmalakna hrang hrangte tarlangin Mizoram University hnuaia zirna-in hrang hrangahte AI Course hrang hrang introduce a nih tur thu a sawi bawk a; MLA-te leh sawrkar hnathawkte pawh tunlai thiamna mila intuaihriam zel tur leh AI te a tha zawnga hmang tangkai deuh deuh turin a fuih bawk.

Success AI Carreer guidance leh LushAIEdu LPS te hi LushAITech kutchhuak niin ‘Success, AI Career Guidance’ hi web based a ni a, Mobile friendly a siam niin, sucess.lushaiedu.com aṭangin access theih a ni a; ‘LushAIEdu LPS’ hi app-based niin appstore atanga access tur a ni ang.