Hnahthial Post | October 15, 2025, Aizawl: Nimin (15 October) khan India rama tribal-te tihhmasawnna tura Department of Science & Technology hnuaia din Science Technology & Innovation (STI) Hub hawnna hun hman a ni a. He hun hi Minister Prof. Lalnilawma, Project Principal Investigator ni bawk chuan a hmanpui a. Prof. Dibakar Chandra Deka, Vice-Chancellor, Mizoram University chuan building hi a hawng a. Project Principal Investigator dang Prof. Raghu Raman, Dean, Amrita Vishwa Vidyapeetham, Kerela leh Prof. Lalnundanga, Registrar, Mizoram University-te chu he building hawnna hunah hian an tel ve a ni.
Mizoram University Vice Chancellor, Prof. Dibakar Chandra Deka chuan building tha ringawt hi project hlawhtlinna tehna a ni lova, a hlawhtlinna tak tak zawk chu a mamawh mipui hnena a thlen a nih thu a sawi. Mizoram University chu Amrita University nen an thawh dun vawi khatna a nih thu a sawi bakah hun lo la awm turah pawh thawh dun zel a that thu a sawi a ni.
Hawnna inkhawm hi Janet Lalremruati, Project Coordinator chuan kaihruaiin, Dr. Lalhmingliana Renthlei, Co-PI in kal khawmte lawmna thu a sawi a. Pu. Lallawmzuala, MZU Engineering Cell hnen aṭangin Technical Report ngaihthlak a ni a. Dr. Baby Zaithanpuii Hmar, Co-PI chuan Project Report pein, STI Hub hmalakna leh hmachhawp te a tarlang a. Kum 2023-a bul tan anih aṭangin direct beneficiaries 9,139 an awm tawh a. Hemi bakah hian STI intervention atangin tribal community huam tam zawk thei turin hma lak tum zel a ni.
STI Hub building hi ₹67.9 lakh senga Mizoram University Campus, Aizawl leh Kawlri Tlang, Serchhipa sak niin, Mizoram University leh Amrita University, Kerala ṭangkawpin an enkawl a ni a. Project Office atan leh ei leh in hrisel siam chhuahna (Food Processing Laboratory) leh training pekna hmun atana hman tur a ni a. Programme hrang hrang pali - Digital Literacy & Adolescent Awareness Ambassador (DL&AAA), Ayurveda and Health, Food & Nutrition leh Agro-forestry hnuaiah Aizawl leh Serchhip District huamchhunga tribal te zirtir leh tihhmasawn hna an thawk a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
Tags
News