Lunglei District Bawrhsapin NH-54/2 leh NH-302 kawngpui zauh leh siam ṭhat hna thawh mek a hmunah a enfiah

Hnahthial Post | October 15, 2025, Lunglei: Nimin (14 October) khan Lunglei District Bawrhsap & Competent Authority for Land Acquisition (CALA) Pi Navneet Mann chuan National Highway-54/2 leh NH-302 kawngpui laih zauh leh siam ṭhat hna thawh meka Theiriat, Hrangchalkawn leh Zobawk huam chhunga hma lakna hrang hrang chu a hmunah kal chilhin a enfiah.

Bawrhsap hi Settlement Officer Pi Jennifer Vanlalhruaii Pachuau leh official dang te, kawng siam mek enkawltu NHIDCL (National Highways & Infrastructure Development Corporation Limited) te, hna thawktu contractor te leh khawtlang hruaitu (local council) te'n an ṭawiawm a. Hna kal meka hmasawnna awm dan leh khawtlang mipuiin harsatna an tawh leh hna thawktute'n harsatna an tawh te en hovin, hma lak zel dan tur leh harsatna hrang hrang chin fel dan tur te an sawi ho.

NHIDCL kawng laih mek NH-54/2 leh NH-302-a zangnadawmna (compensation) la tawh, mahni in leh lo la chhuahsan lo leh bungrua la dahte chu enfiah niin, a rang lama an in leh lo te chhuahsan a, an bungrua thiar chhuak tura hriattir an ni a. Kawng atana ram lak, ROW (right of way) chin leh road reserve chin huam chhung neka in sak nia lang ṭhenkhatte enfiah ni bawkin, ROW huam chhunga in sa mekte chu sak chhunzawm tawh lo tur leh ṭhiah ngaite pawh a rang lama ṭhiat tura hriattir nghal an ni.