Dampa By Election tluang taka zawhfel ni

Hnahthial Post | November 12, 2025, Mamit: 2-Dampa (ST) AC By-Election chu nimin 11th November, 2025 (Thawhlehni) khan boruak muanawm tak hnuaiah tluang taka zawhfel a ni a, vote tla hi 83.07% a ni.

2-Dampa (ST) Assembly Constituency huam chhungah hian Voters mipa 10637, hmeichhia 10231 an vaiin mi 20888 an awm a, heta tanga vote tla zat hi Mipa 8921 leh hmeichhia 8430,an vaiin mi 17351 niin hei hi 83.07% a ni a. Hetah hian Postal Ballot hmanga vote tla chhiar tel a la nilo a ni.

Tarlan tawh angin 2-Dampa (ST) AC hian Polling station 41 a awm a, inthlanna tluang taka neih zawh a nih hnuah Polling Station hrang hranga EVM & VVPAT hmanga vote tha te hi venhimna tha tak hnuaiah District Election Office zing dar 4:27 khan thlen felpui niin, EVM & VVPAT te hi Vote chhiar ni 14th November, 2025 a lak chhuah turin strong room-ah uluk tak leh venhimna tha tak hnuaia awm turin dah luh nghal an ni.