Hnahthial District Inter Departmental Sports, 2025 hawn a ni

Hnahthial Post | November 12, 2025, Hnahthial: Hnahthial District chhunga sawrkar hnathawkte inlungrualna atana buatsaih - Inter Departmental Sports, 2025 chu vawiin khan HDFA Turf Ground-ah Bawrhsap, Pi K. Vanlalruati chuan a kick-off a. Mipui rawngbawlna kawnga thawhona tha tak rah chhuahtirtu a nih a beisei thu a sawi.

Bawrhsap chuan sawrkar hnathawktute hlim hmel hmuh a nawm thu sawiin sports zangkhai leh hlim tak hman a nih a beisei thu a sawi a. Rilru leh taksa tana sports thatna te tarlangin sawrkar hnathawkte ngat tan phei chuan infiam a, taksa sawizawi that a pawimawh hle a ni a ti a. Office hrang hrangte chu kan inkungkaih vek avangin he sports kaltlang hian thawhhona tha lehzual kan hmuh tlan ngei a beisei thu a sawi.

Opening function hi Pu Zothanmawia Khiangte, Addl DC chuan kaihruaiin group inchhiarna, Pu George Lalnutluanga, DFDO kaihhruaiin neih a ni a. Dr K. Lalzuimawia'n Group tinte thutiam lakna a neihpui bawk a ni.

Inter-Departmental Sports, 2025 ah hian office hrang hrang telna Group li (4) - Ropuiliani, Zakapa, Darbilhi leh Saikuti Group-te siam an ni a. Ni thum awh tura buatsaih niin HDFA Turf ground-ah tun Zirtawpni (14.11.2025) hian kharna hun buatsaih a ni ang.