Labour & Employment Minister inkhawmpuiah LESDE Minister Pu Lalnghinglova Hmar a tel

Hnahthial Post | November 11, 2025, New Delhi: Nihnih awh tur ‘National Conference of Labour & Employment and Industry Ministers and Secretaries of State/UT Governments’ chu khan Bharat Mandapam, New Delhi-ah tan a ni a, Mizoram aiawhin Conference-ah hian Pu Lalnghinglova Hmar, Minister of State, Labour, Employment, Skill Development & Entrepreneurship (LESDE) Department a tel.

India rama Labour & Employment leh Industries Minister leh Secretary te inkhawmpui hi Ministry of Labour & Employment (MoLE) buatsaih niin, Union Labour & Employment Minister Dr. Mansukh Mandaviya leh Union Minister of State Pi Shobha Karandlaje te’n an telpui a ni.

He hunah hian Mizoram LESDE Minister Pu Lalnghinglova Hmar chuan thu sawiin, Labour kaihhnawih rampum huap thil sawiho tura state/UT te nen inrawnkhawmna buatsaih a ni chu thil pawimawh tak a ni tiin, conference buatsaihtu Ministry leh a changtu Minister chungah lawmthu a sawi a. “Labour & Employment Ministry hmalakna kaltlanga hna thar kan siam belh rualin hnathawktu tha siam belh a ngai. Chumi tur chuan chak zawka skill development kalpui tel a ngai a ni.” a ti. Labour kaihhnawihah state/UT hrang hrang dinhmun a inang lo thei hle tih tarlangin, “Keini’n a sâng bi a thil kan sawi laiin a then chuan a nuai bi, a vaibelchhe bi te’n an sawi. Kan hmalak theih chin leh kan mamawh a inchen lo a, dan hnuaiah state zawng zawng hrutrual vek lovin kan mamawhna mila herrem theih dan zawn a pawimawh a ni.” a ti.

Pu Lalnghinglova Hmar chuan LESDE Department kal tlangin Mizo thalai engemawzat Japan leh ram dangah hnathawk turin an kal tawh tih a tarlang a. Tawng zir tura Delhi pan a ngai thin chu thil hautak tak a nih avangin, Mizoram chhung emaw hmar chhak lamah ṭawng zirna hawng turin rawtna a thlen.

LESDE Minister chuan Mizoramah Private Placement Agency-te awmze nei zawka kalpui tura sorkar ruahmanna neihte a sawi chhuak a; India ram pawn mai ni loin ram chhunga mahni state pawna hnathawkte awmze nei leh him zawka enkawlna tura inziah luhna buatsaih ṭul a tih thu sawiin he mi kawnga Labour Ministry hmalakna chu a thlawp thu a sawi.

National Labour Conference hi sawrkar laipui leh state/UT sawrkarte inkara thawhhona tha leh chak zawk a awm theihna’n buatsaih a ni a, MoLE hnuaia hmalakna hrang hrangte chak zawk leh awmze nei zawka kalpui dan tur ngaihtuahho a ni. Conference hi session hrang hrangah then niin, presentation bakah rawtna siam leh sawihona hun hawn zel a ni.

Conference ni khatnaah hian MoLE hnuaia Employees’ Provident Fund Organisation (EPFO) in a kalpui mek, kum hnih chhunga hna thar vaibelchhe 3.5 siam belhna tur scheme ‘Pradhan Mantri Viksit Bharat Rozgar Yojana (PM-VBRY)’ kalphung inhrilhfiahna leh sawihona neih a ni a. He scheme hnuaiah hian hna thawk thar (hna la nei ngai lo) tan incentive Rs. 15,000/- dawn theihna leh, hnathawk tur rawih belhtu employer te’n incentive an dawn theihna awmin, budget ah cheng vaibelche 99,446/- dah a ni. He scheme hian August 1, 2025 leh July 31, 2027 a hna siam tharte a huam ang.

In sak leh a kaihhnawih construction a thawk, ‘Building and Other Construction Workers (BOCW)’ te hmasawnna tur chungchang pawh ngaihtuahho a ni a. Union Minister chuan BOCW hnathawkte tana hna zawnna portal ‘Digital Labour Chowk’ app bakah, online-a Labour Cess pek theihna tur software a tlangzarh nghal a ni. ‘Shakti Niti 2025-National Labour & Employment Policy’ leh ‘Private Placement Agencies (Regulation) Act 2025’ duan mek (draft) te ennawna sawiho a ni bawk.

National Labour & Employment Conference-ah hian Mizoram atangin Pu Vivek Kumar Tripathi, Addl. Secretary, LESDE Department, Pu John Tanpuia, Director, LESDE Department leh Pu H. Lalramenga, PS to Minister te’n LESDE Minister hi an tawiawm a ni. Conference hi naktukah chhunzawm tur a ni.