Hnahthial Post | November 11, 2025, Aizawl: Vawiin khan VOLCOMH, Maumual, Chaltlangah Revenue Department hmalaknaa Maumual ram teh fel atanga Land Pass 456 semchhuahna hun hman a ni a. Land Revenue & Settlement Department Minister Pu B.Lalchhanzova chu khuallian niin Pu Vanlalmawia, Secretary, LR&S Department chuan kalkhawmte lawmna thu a sawi a. Maumual Land Owners, Peace Accord MNF Returnees Association (PAMRA), Local Council hruaitute leh LR&S Department-a thawktute he hunah hian an tel a ni.
Revenue Minister Pu B.Lalchhanzova chuan thil tha, felfai leh mumal zawk duhna avanga Maumuala ram neitu leh Revenue Department-a thawktute thawhhona zarah Maumaul ram tehfel hna chu hlawhtling taka kalpui a nih thu a sawi a. Buaina chinfel a nih theih nan ram neitute zingah inphahhnuai hreh lote, tawlh hnung hreh lote leh mi inphal tak tak engemaw zah awm chuan hna a tih sawt phah hle thu tarlangin, fakawm a tih thu a sawi bawk a ni.
Pu B.Lalchhanzova chuan ram vanga buaina tam zawk chu ‘duhamna’ vang a nih fo thu sawiin duhtawk chin hriatna hian buaina tam tak a chinfel phah theih thu a sawi a. Mahni thil neih chu kan hrechiang tur a nih thu leh uluk taka enkawl a pawimawh thu tarlangin, kan ram neihte pawh felfai taka ramri hung thin turin kalkhawmte a chah bawk a ni.
Revenue Minister chuan Sawrkar chu mipuite tana rawngbawl tur a nih thu sawiin Revenue Department pawh mipuite tana dawr nuam leh awlsam a nih theih nan an insiamrem mek thu a sawi a. Sawipuitu nei ve lo te, duhsaktu nei ve lo te, mi harsa leh hmangchang hre lo zawk ten an chanvo dik tak an chan theih nan leh dik lo taka rawk an nih loh nan Sawrkar hnathawk ten mawhphurhna pawimawh tak an nei, tih a sawi a. Midang tana luanchhuah duhna thinlungpu chungin, ram siam hna an thawhna kawngah Sawrkar hnathawkte chu mipui min mamawhna hmun apianga awm hreh lo tur an nih thu a sawi bawk a ni.
Pu B.Lalchhanzova chuan, hna sawt zawka kalpui a nih theih nan Mizoram sawrkar chuan tunlai thiamna hman tangkai tumin E-file system hman tan a nih thu a sawi a. Revenue Department hnuai ah pawh hna chak zawka kalpui a nih theih nan E-Ram software kalpui a nih tawh thu sawiin he Software hi mi tam zawkin belchiang a hmang tangkai tura a duh thu a sawi.
Pu R.Lalthazuala, Director, Land Revenue & Settlement Department tarlan danin Maumual ram teh thah hna hi May ni 23, 2022 atang khan kalpui tan a ni a. Survey nan hian kawng km 11.65-a thui laih niin kawng laihna leh Survey hna thawh nan hian Cheng 41,37,872 hman a ni a. Ram 831 teh that niin Land Pass 456 pek chhuah theih a peihfel a ni a. Land lease 13 leh Land Bank 61 teh fel a ni bawk.
Vawiin Land Pass semchhuahna hunah hian Local Council, Maumual Land Owners leh PAMRA atangtein thusawi ngaihthlak a ni a. Pu C.Lalchhuanmawia, Deputy Director of Survey, LR&S Department chuan lawmthu sawina hun a hmang bawk a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News