Lungleiah SEIL National Integration Tour to Mizoram kharna hun hman a ni

Hnahthial Post | November 11, 2025, Aizawl: Vawiin chawhnu dar 2 khan HATIM Conference Hall, Kawmzawl, Pukpui, Lungleiah Students' Experience in Inter-State Living (SEIL) National Integration Tour to Mizoram kharna hun, "Valedictory Programme" hman a ni a. Lunglei District Information & Public Relations Officer Pu C. Lalhruaitluanga chu khuallian niin, HATIM Principal Dr R. Lalnunthara chu khual zahawm a ni.

Khuallian, Lunglei DIPRO Pu C. Lalhruaitluanga chuan SEIL Tour kal tlanga India ram hmun hrang hranga zirlaite'n hnam dangte zinga khawsa a, an nunphung leh hnam ziarang zirna hun remchang an nei chu ṭha a tih thu sawiin, Mizoram tlawha lo kal zirlaite chuan tawn hriat ṭha tak, an hma hun atana ṭangkai tur an hawn a beisei thu a sawi a. State pawn aṭanga lo kalte chuan "Mizo tlawmngaihna", phut let nei lova mi dang ṭanpui duhna chu a taka an tawn a, Mizoram an hriat reng dan leh an kalna apianga an nunpui a nih a beisei thu sawiin, hnam ziarang, ṭawng leh nunphung hrang hrang neite nen an khawsak hona aṭanga an tawn hriatte chu India ram ropuina hriat thartirtu leh ram leh hnam inpumkhat duhna thinlung puttirtu atan hmang turin a chah.

Khual zahawm, HATIM Principal Dr R. Lalnunthara chuan HATIM college-in SEIL Tour Valedictory Programme an dawl thei chu lawmawm an tih thu sawiin, an college dinhmun tlangpui a sawi a. Ram ropui zawk din turin a chhunga chengte inpumkhat ṭhat a pawimawh thu sawiin, India ram chu hnam, ṭawng leh tihdan phung hrang hrang neite lung rual taka khawsakna ram a nihna chhawm nung zel turin zirlaite chu inpumkhatna thuchah theh darhtu ni turin a chah bawk.

He hunah hian United Pentecostal Church (North East India) Lunglei District Secretary Rev. PC Lalfakawma'n hunserh a hmang a. DIET Lecturer & SEIL Delegate 2004 Pu HP Lalremtluanga pawhin SEIL Tour kalpui dan tlangpui leh a hlutna leh ṭangkaina te sawiin, State pawn aṭanga lo kal SEIL delegate zirlaite aṭangin Mizoram an tlawhnaa an tawn hriat leh an hlawkpui dan te ngaihthlak a ni bawk a. Zaithiam Esther Hnamte chuan zaia kal khawmte awiin, HATIM zirlaite'n chheih lam an entir bakah, SEIL delegate-te'n an hnam lam an entir bawk a. SEIL delegate-te hnenah hian ngaihhruina thilpek hlan ni bawkin, SEIL Mizoram Coordinator Pu C. Lalramluahpuia chuan lawm thu sawiin hun a khar.

SEIL National Integration Tour to Mizoram hi Akhil Bharatiya Vidyarthi Parishad (ABVP) bul tuma buatsaih niin, tun ṭumah hian phai lam state hrang hrang aṭangin zirlai pakua chu Mizoram chhim lamah an lo kal a. November ni 7 aṭanga November ni 11, 2025 chhungin Lawngtlai, Siaha leh Lunglei District-ah hun hmangin, ram hruaitute leh District thuneitute, zirlai pawl leh tlawmngai pawlte nen an inkawm bakah, hmun pawimawh hrang hrang an fang kual a. Hemi chhung hian Mizoram leh Mizote chanchin, nunphung, hnam ziarang leh thil pawimawh hrang hrang zirpui an nih bakah, Mizo inmikhual dan leh Mizo ei leh in te an hriat thiam theih nan thingtlangah leh khawpuiah khawtual mite inah thlengin, hun an hmang ho bawk.