LESDE Minister-in Mizoram chhung Sawrkar School 12-ah Skill Lab hawng

Hnahthial Post | November 14, 2025, Aizawl: Vawiin khan Pu Lalnghinglova Hmar, Minister, Labour, Employment, Skill Development & Entrepreneurship (LESDE) Department chuan zirlaiten zirna leh IT lama thiamna an neih theihna tur Skill Lab chu Govt. K.M. High School, Dawrpui Vengtharah a hawng a. Skill Lab hi SANKALP Scheme hnuaiah district 11 a school 12 ah din niin, Minister chuan Govt K.M. High School atang hian a vaiin a hawng a ni. He hun hi Pu John Tanpuia, Director, LESDE Department chuan a kaihruai a ni.

Minister Pu Lalnghinglova Hmar chuan khawvel thiamna inher danglam zel mila zirlaite pawh an inzir zel a pawimawh thu a sawi a. Khawvelin hma a sawn zela, thiamna thar lo chhuakte thiam ve lo chu kalsan an ni dawn tih sawiin, zirlaite chuan Skill Lab hawn thar chu IT lam an hmelhriata an thiam ve theihna tur leh hmang tangkai turin a chah a.

Minister chuan lehkha thiamna hmanga hna hmuh vek theih a nih loh avangin eizawnna tlaka thiamthil (skill) neih a pawimawh thu a sawi a. Chumi kawnga thalaite pui turin ITI-ahte skill hrang hrang, drone hman dan thlengin zir theih a ni a ti a. Govt K.M. High School zirlaite chu Mizoram Youth Commission leh ITI tlawh tura a duh thu sawiin, an veivah man tumsak a inhuam thu a sawi bawk.

LESDE Department chuan School Education Department nen tangkawpin sawrkar school thlan bikteah Skill Labs din a nih theih nan hma a la a. Skill Lab din a nih hian zirlaite chu zirna leh hnathawhna lama hmasawnna atana thiamna pawimawh tak tak pek tum a ni a. He hmalaknaah hian Mizoram chhunga district 11 huamchhunga sawrkar school 12-ah Skill Labs din a ni a, zirlai 2,413 velin an hlawkpui theih beisei a ni.

IT sector hnuaia Course on Computer Concepts (CCC) hmanga digital literacy leh IT thiamna tihpun chu ngaih pawimawh a ni a. He course hmang hian zirlaite hnenah computer application leh digital literacy lama foundational knowledge pek tum a ni a . He program hian practical learning a ngaih pawimawh bakah zirlaiten tunlai khawvel tana IT thiamna pawimawh tak tak an neih theih nan a pui dawn a ni.

Skill Labs hnuaiah hian sikul thlan bikte hnenah heng a hnuaia mite hi pek an ni.

Heng bakah hian sikul zawng zawngah Skill Lab siam nan hian room awm sa te chu thawmthat (renovate) vek bawk a ni.

Skill Lab siamna School-te leh District-te: