PHE Minister-in Aizawl Water Supply Scheme tih hmasawnna tur vaibelchhe 47.8 hu project a hawng

Hnahthial Post | November 14, 2025, Aizawl: Nimin khan Aizawl khawpuia tui supply tih hmasawnna tura duan 'Strengthening of Aizawl Water Supply Scheme' project chu Public Health Engineering Department Minister Prof. Lalnilawma'n a hawng. He project hi SASCI Part - 1 hnuaia hmalakna niin khuhhawnna hun hi Chaltlang Dawrkawn-ah buatsaih a ni a, PHE Secretary, Pi Zodingpuii'n hemi puala inkhawm hi kaihruaiin Sister Department hrang hrang - PWD, P&E, Police leh Geology & Mining te bakah AMC leh Aizawl Joint Local Council hruaitute an tel a ni.

PHE Minister chuan he project-in a thil tumte sawiin Aizawl khawpuiin tui hnianghnar zawk a neih theihna tura hmalakna a nih thu a sawi a; Tlawng Lui tui kam zel avanga thal laia tui pump chhuah harsa thin tih ziaawm nan, tui khuahna tih san a nih tur thu te, tui dahkhawlna siam belh a nih tur thu te, Aizawl veng hrang hranga chak zawka tui sem chhuah a nih theih nana hmalakna a nih thute leh tui pump-na hmun leh pipeline-te tih changtlun a nih tur thute a sawi a. Tui hnianghnarna tur hian kawng hrang hrang hmangin PHE Department chuan theih tawp an chhuah thu sawiin, Hualtu atanga Gravity a tui lak pawhin Mualpui a haw thlen tawh thu a sawi bawk.

Khawpui chhunga tui pipe siam hna hi zan dar 10 atanga zing dar 6 inkarah thawh thin a nih tur thu sawiin hnate tha taka thawh a nih theih nan leh thawh zawh thuai a nih theih nan mipuite leh he project-in a nghawng tur veng mite tawiawmna bakah department hmalaknate hrethiama, hna thawktute lo dawngsawng thiam turin a sawm a, pipe phumna iloah kawngpui laih chhiat a ngaih changte a awm dawn thu sawiin khawtlang that tlanna tur a nih dawn avangin mipuite hriatthiamna a ngen nghal bawk a ni.

Pi Zodinthari, Engineer-in-Chief chuan PHE Department hma lak dan tur hrang hrangte a sawi a; Er. Lalrinzuala Ralte, SE (AWC), PHE hnen atangin Project report ngaihthlak niin, Pu Lalringliana, Executive Corporator, AMC Ward - II bakah Aizawl City Joint Local Council hruaitute'n thusawina hun an hmang bawk a, Er. Ngentluanga, Chief Engineer, Zone-I, PHED chuan lawmthu sawiin hun a khar a ni.

He project hnuaia hmalak dan tur hi hlawm lian deuh deuh pathum-ah hetiang hian then a ni:-

1. AIZAWL WATER TRANSMISSION DIVISION HNUAIA THAWH TURTE -

i) Greater Aizawl Water Supply Phase - II tui khuahna awm sa chu RCC-in tih san a ni dawn a, he tui khuahna tih san hian tui litre nuai 900 a khuap belh thei dawn a ni.

ii) Commmunication, Monitoring leh Control System tih changtlun nan tunlai khawl changkang tak tak hman chhoh niin tui quality leh flow level monitoring lam-ah nasa takin hma kan sawn phah dawn a ni.

iii) Fur laia Tlawng tui nu nasa lutuk tih ziaawm nan, Pre-Settling Tank sak a ni dawn a, Submersible Pump set thar pathum fit a ni bawk ang.

iv) Raw - Pumping Station sak thar niin Pumping main fit a ni dawn a, Phase-Il Intake Weir atangin direct-a Phase-1 Jackwell-a tui luhna tur pipeline fit tur niin fur laia Serlui tui nu zual drain-na turin Serlui Gravity Main-ah Scour line fit a ni anga, chu chuan Serlui tui, fur laia a nut lutuk avanga harsatna kan tawh thinte a su kiang dawn a ni.

2. AIZAWL CHHIM LAM CHAWMTU TUI KAWNGTE HETIANG HIAN THAWMTHAT A NI ANG -

i) Lungleng-Samtlang-Chhimphei lama tui pekna pipeline, ramhnuaia kal a nih avanga, line a chhiat chang pawha siam that buaithlak leh harsa tak ni thin sut kian nan Samtlang kawngpuiah 200mm G.I pipe 2991.00 Rm phum a ni ang.

ii) Tuikhuahtlang atanga Chhimphei khuaho tui pekna pipe, a hlui tawh bakah D.I-pipe a nih avanga pressure a nat changa chhe ngun em em leh siam that leh nan hun rei tak ngai thin chu a lo chhiat pawha thlak zung zung theih, ERW 250mm - 3,820 Rm hmanga thlak a ni ang.

iii) Tui dahkhawlna tur Zonal tank litre nuai 5 dawng Venghnuai-ah leh litre nuai 2.5 dawng Melthum-ah siam tur a ni bawk.

3. AIZAWL HMAR LAM CHAWMTU TUI KAWNGTE HETIANG HIAN THAWMTHAT A NI ANG -

i) Laipuitlang Tuizem leh Durtlang Booster inkar, Zemabawk Zonal Tank, Thuampul Zonal Tank leh Berawtlang Feeder siam a ni ang - Laipuitlang tuizem atangin pipe pathum- 323.9 mm dia ERW; 200 mm dia GI(H) leh 150 mm dia GI(H) te a chhuak ang. 323.9 mm (13 inch) dia 3,700 Rm-a thui hian Durtlang booster-ah tui a pe anga; 200mm (8 inch) dia 8,000 Rm-a thui hian Zemabawk Zonal tank-ah tui a pe anga; 150 mm (6 inch) dia 5,300 Rm-a thui hian Thuampui zonal tank-ah tui a pe ve thung dawn a ni. Zemabawk line 200 mm atang hian 150 mm dia GI(H) pipe, 1,800 Rm-a thuiin Berawtlang zonal tank-ah tui hi pek a ni bawk dawn a ni.

ii) Falkland Zonal Tank-ah tuizem littre nuai 3 dawng sak a ni dawn bawk a, tui pekluhna tur pipeline siam a ni dawn bawk a ni.

He project hi Vbc 47.8 senga thawh tur nin Aizawl WATSAN Circle, PHE Department hnuaia Division pathum ten an thawk dawn a ni.

Project zawh a nih huna a hlawkna turte:

37 MLD Aizawl Water Supply Scheme Phase-III hi a nih tur angin hman tangkai a ni tawh anga, Aizawl khawpui chhungah tui hnianghnar taka sem theih a ni tawh ang. A bik takin Aizawl North Area tan atangkai hle dawn a ni.

Phase - III tuiin Durtlang Booster Pump a chawm thei tawh anga, he Booster Pump-in a chawm - Durtlang, Durtlang Leitan, Durtlang North, Selesih, Sihphir, Neihbawih, Nausel, Thuampuk, Zuangtui, Falkland leh Shalom Vengte hnianghnar zawka tui pek theih a ni ang. Durtlang Booster Feeding Mains zawh fel a nih hunah chuan Tuikhuahtlang atanga chawm a ngai tawh lo anga, Aizawl South area-in tui an hnianghnar phah sawt tura ngaih a ni bawk.

Zemabawk leh Thuampul area-in 100 mm dia Feeding Mains an intawm avanga harsatna an tawhte nasa takin a su klang dawn a ni. Zemabawk 200 mm dia line thar fit zawh a nih hunah chuan tuna line kal mek hi AR Zokhawsang tan a dah hran theih tawh anga, AR Zokhawsanga awmte tui hnianghnar zawk in pek theih an ni tawh ang. Cancer Hospital thar turte, RIPANS te pawh hneh taka tui pek theih beisei a ni a, Bungbanglaa Mizo Territorial Army awmna tur tui pekna tur thlengin Zemabawk 200mm dia line hian a tih awlsam phah dawn a ni.

Falkland Veng hi Zonal tank 1.7 lakh litre-in tunah hian a chawm mek a, tuizem a tet avangin rualkhai leh hnianghnar takin tui a sem hleih theih loh a. Tuizem litre nuai 3 dawng sak hunah chuan rualkhai leh hnianghnar taka tui sem theih beisei a ni. Tui connection 200 hneh takin a chawm thei dawn a ni.

Tlawng Lui khuahna tih san a nih hunah chuan thalah pawh tui mamawh tawk pump chhuah tur a awm beisei a ni.

Samtlang-Lungleng-Chhimpheite pipeline hlui tawh avanga harsatna nasa takin a su kiang dawn a, heng hmuna mite hian tui hnianghnar zawk an hmuh theih beisei a ni.