Hnahthial Post | November 24, 2025, Aizawl: Mizoram Civil Service Association (MCSA) Conference vawi 49-na, McCabe Hall, Aijal Club-a hman chu vawiin chawhma dâr 10 khan DP&AR Minister Pu K. Sapdanga’n khuallian niin a hmanpui a, MCSA buatsaih 11th Edition RAHBI Magazine a tlangzarh nghal bawk.
Khuallian DP&AR Minister Pu K. Sapdanga chuan state dang kalphung tha zâwk angin, mipuite tana awlsam nan leh rang zawka service pêk chhuah a nih theih nan District Administration-te chu mini-secretariat anga hnathawk (function) turin kalpui tum a ni a, Sorkar-in hma a la chho mêk tih a sawi. Thil eng emaw tih dawn hlek a, thingtláng kilkhâwr zawk atanga Aizawl pan ngai kher lovin, District Headquarters-a tihfel mai theih turin power pawh hi semzai a ngai a, ‘decentralization of power’ tih dawn hian Sorkar hnathawk thenkhat zingah pawh ui tlat, phal tlat lo, harsatna hlîr ngaihtuah a awm theih a, chung pawh chu ram tana tha tur a nih chuan kan pal luih deuh pawh a ngai ang, tiin a sawi.
MCS officers-te chu mi dang tana nu leh pa chan chang thiam zel tur leh MCS kherna leh sawiselna awmte chu kher lêt ve zel lovin, mahni insiamthat tûlna a awmna lai apianga insiam thatna atana hmang thiam turin a chah a. Mi dangin darkar 5 an thawh chuan MCS officer chuan darkar 7 thawh tur a ni. Mi dang aia thawh tam te, zaidam te, ngilneih te, tlâwmngaih te, rinawm te, hriatthiamna neih te, mi dang thawhpui thiam te, mi dang aia hriatna zau zawk neih te hi ‘premier service’ quality chu a ni. Kan rilru sûkthlêk leh mi dangte nen kan inlaichinnaah hian inti lal taka va rah beh a ngai lo va, kan thinlung leh mite thinlungah hnathawh leh nungchang hmangin ‘premier service’ tih hi tuh zawk tur a ni. Mi dangte aiin in nungchang hi miin an thlîr bîk a, mi dangin an tih, an sawisel lem lohah pawh MCS tih a nih chuan a langsâr hma bik thin. Vawi khat hming chhiatna neih tawh chuan, tui bua ruh harsa tawh ang hi a ni thin a, nungchang uluk taka hman a pawimawh thu a sawi bawk.
Hun leh kum inher danglam ngaihtuah chung zela thutlûkna (decision) tha siam tur kan nih hria ila, kan signature hian order a siam ngawt lo, file a clear ngawt lo a ni. Vawiina kan decision hian eng tin nge a tha zawngin mipui a nghawng, tuna la piang lote pawhin nakina an hman tur a ni tih hriain uluk leh taima taka zir chian hnuah decision siam thin tur a ni. ‘Vikshit Bharat 2047’ kan thlen hunah ‘Vikshit Mizoram’ kan ni ve tur a ni tih ngaihtuahna nei chungin thutlûkna siam zel turin a MCS officer kal khawmte chu a chah a ni. A sawi zelnaah minister chuan, civil service officer-te chu pressure hrang hrang kara awm in ni a, mipui duh dan leh political level-a duh dan a inan loh châng a awm fo va, inan chang pawh a awm teuh va. Chumi inkara awm chu in ni thin. He shock awm thin, he pressure awm thin lo tudai thiam, lo hîp ral thiam nih hi Civil Service Officer tha awm dan tur a ni. In ‘absorbing capacity’ a that poh leh ‘system resilience’/‘kalphung rintlâk’ kan nei tihna a ni ang, tiin a sawi.
Social media titia lâr tak ‘Aizawl-centric thinking” tih hi Secretariat-a kan officer tam zawkte, Aizawl pêl lêm lo an tam vang niin a lang a. A mimal an tha lo tihna ni lovin, Aizawl pawn pela ngaihtuahna neih an harsat em em thin a ni. Chu’ng official-ten thil an lo duan tawh, political level-a lo siamrem chu a harsa tawh thin hle a. Hei vang hian sorkar policy tam takin thingtlang/mipui mimir a thlen phak loh phah fo a ni. Civil Service-te chu ram rorelna ruhrel ‘structure/steelframe’ in nih angin, Mizoram pum huap ngaihtuahna nei thei tur chuan Junior leh Senior Grade-ah field posting in ngah leh zual a pawimawh a, chutiang tur chuan transfer and posting pawh uluk takin kan kalpui ang a, role-based, competency-based, right man at the right post ni thei turin Sorkar chuan hma a la dawn a ni, tiin a K. Sapdanga chuan a sawi a ni.
‘Mizoram Handholding Scheme leh Central Flagship Programme hrang hrangte a taka tihhlawhtlinna chu district-ah a innghat tlat a, chuvangin sawrkar flagship scheme kalpui danah te, law and order enkawlna chungchangah te, revenue administration tihchangtlun zel chungchangah te theihtawp chhuah zel ang che u, tiin kal khawmte chu a chah bawk a ni.
Vawiina Mizoram Civil Service Association Conference chawhnu lam hunah hian Sorkar-in hma a lâk mêk, administrative reforms– ‘Institutionalization of District Administration as an integrated Mini-Secretariat’ leh ‘Ongoing Reforms and Progressive Decentralization of Land Revenue Administration’ chungchang zirhona leh sawihona neih nghal a ni bawk.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News