Union Minister of State Shri Ram Nath Thakur-in Siaha tlawh

Hnahthial Post | November 24, 2025, Siaha: Vawiin khan Union Minister of State for Agriculture and Farmers' Welfare, Shri Ram Nath Thakur chuan 'Poorvottar Sampark Setu Programme ' hnuaia hnathawh hrang hrangte enfiahin Siaha a tlawh a. Pu M. Laikaw. CEM,MADC, Pu VL. Hruaizela Khiangte, District Bawrhsap, leh Pu Manjeet Singh Sankhla, Superintendent of Police, ten Helipad ah lo hmuakin an lo dawngsawng a ni.

Pu Ram Nath Thakur chuan Golden Jubilee Hall, MADC Complex, panin hetah hian Agriculture Department - ten Exhibition an buatsaih a tlawh nghal a. Hemi hnu hian a ma puala thutkhawm buatsaihah thusawina a nei a. Shri Ram Nath Thakur chuan sawrkar mi leh Siaha mipuite chibai bukna a nei hmasa a. Prime Minister thupek anga lo kal a nih thu sawiin, Siaha mipuiten harsatna an neih leh mamawhte chu Prime Minister hnena a thlen tur thu a tarlang a . Lo nei mite hmasawnna chu sawrkarlaipui ngaihpawimawh ber a nih angin, chak taka hmalak mek zel a ni, a ti.

Union Minister of State - chuan Loneitute chu tha hnem ngai taka thawk turin a chah a. Sawrkarlaipuiin tanpuina a pek thin leh Scheme - hrang hrang a kalpuite tihlawhtlingtu nih tum turin a fuih a. Hmalam hunah pawh tanpuian pek zel a nih tur thu tarlangin, mamawh an neite ziak thlen tura chahin, Prime Minister leh Union Minister for Agriculture and Farmers' Welfare hena amah ngeiin a pek tur thu a sawi. Union Minister of State - chuan Siaha mipuiten an lo lawmnaah lawmthu sawiin, duhsakna a hlan nghal bawk a ni.

Pu VL. Hruaizela Khiangte chuan hun thutkhawm kaihruaiin, Union Minister of State leh kalkhawmte lawmna thu a sawi a. Siaha District - dinhmun tlangpui tarlanna a nei nghal a ni. Pu M. Laikaw , CEM, MADC- chuan Siaha mipuite aiawha chibai bukna neiin, sawrkarlaipuiin Autonomous District Council - te tanpuina a pek thin chu tangkai taka hman thin a nih thu sawiin, khawsak harsa zawk ten an chhawr tangkai hle a ni, a ti . Siaha mipuite tana tanpuina awm thei ang angah pawh thahnem ngai taka ngaihpui turin Union Minister - chu ngen a. CEM chuan MADC- dinhmun leh hnathawh dan tlangpui tarlanna a nei nghal bawk.

Thutkhawmah hian Agriculture Department, Govt. Of Mizoram, ten Sawrkarlaipui hnuaia Scheme hrang hrang an kalpuite leh an thlen chin tarlanna an nei a. Mamawh an neihte pawh Union Minister - hnenah hian an thlen nghal a ni.

Union Minister of State for Agriculture and Farmers' Welfare puala thutkhawm neihah hian Siaha District - a Official - te an telkim tha hle a. Pu VL Hruaizela Khiangte chuan lawmthu sawina neiin hun a khar.