Mizoram Larsap hovin Janjatiya Gaurav Varsh 2025 lawm

Hnahthial Post | November 14, 2025, Aizawl: India ramin zalenna a hmuh theih nana tribal hruaitu thawh hlawk tak, Bhagwan Birsa Munda pianchamphaphak vawi 150-na pualin vawiin khan Raj Bhavan Circular Lawn, Aizawlah Planning & Programme Implementation (P&PI) Department buatsaihin 'Janjatiya Gaurav Varsh -Tribal Pride Day' lawm a ni a. He hun hi Larsap, General (Dr) Vijay Kumar Singh, PVSM, AVSM, YSM (Retd) chuan Khuallian niin a telpui a ni.

Mizoram Larsap, General (Dr) Vijay Kumar Singh chuan India tribal-te tana hun pawimawh tak 'Janjatiya Gaurav Varsh' puala Mizoram mipuite chibai bukin, hei hian India rama tribal-te chawimawiin, an hlawhtlinna, kalphung inhlanchhawn zelna leh hmasawnnate a chawilar a ni, a ti a. India rama chengte chu tribal kaihhnawih nei vek kan nih thu leh, a thenin tribal hnam ziarang leh nunphung an kalsan tawh laiin a thenin an la chhawmnung zel a, Mizote hi a la kalpui zelte zinga mi a ni, a ti a. Tribal hnamte chu an chhevela thil awmte nena lungrual taka chengho thiam, nakin zel thlenga khawsakna tlak ram a awm theih nana pawimawh tak an nih thu sawiin, tribal-te hnam ziarang leh nunphung hausa tak hunhalha chawilar a nih theih nan Prime Minister-in theihtawp chhuaha hma a lak thu a sawi bawk.

Larsap chuan India ramin zalenna a neih theih nan leh british awpbehna dodal nan sakhua leh hnam tih bik awm lova theihtawp chhuaha hmalak tlan a nih thu leh, tribal-te chu heng zinga pawimawh tak an nih thu sawiin, pawnlam awpbehna laka him nan Mizoram pawhin theihtawp a chhuah tih a sawi a. Prime Minister-in India ram hmun dangte ang bawka tribal-te chenna zawng zawngin hmasawnna a hmuh theih nana theihtawp a chhuah thu leh zirnna, hriselna leh adangahte scheme tangkai tak tak a duan thu sawiin, Janjatiya Gaurav Varsh chuan mitin thinlungah tribal-te hmasawn nana bei tura inpekna thar leh hmasawnna awmze nei a awm theih nana harh tharna thlen se a duh thu a sawi bawk.

General (Dr) Vijay Kumar Singh chuan hmasawnna leh kan chhevela thil awmte inhnerem taka kalkawp tir thiam a pawimawh thu leh, environment humhalh that a tul thu a sawi a. India ram hmasawn leh intodelh Viksit Bharat @2047 tihhlawhtlin a nih theih nan hnam leh khawtlang zawng zawngte rualkhai taka hmasawn a tul thu sawiin, kalkhawmte chu Mizo hnam hmasawn, a nihna leh ziarang hloh chuang lo siam tura theihtawp chhuah turin a chah a ni.

Thusawitu dang Pu Vanlaldina Fanai, Commissioner & Secretary, P&PID chuan tribal-te chawikan nana Ministry of Tribal Affairs hmalakna fakawm a tih thu sawiin, Dharti Aaba Janjatiya Gram Utkarsh Abhiyan (DAJGUA), Adi Karmayogi Abhiyan, Article 275 (1) Grant leh adangte chuan tribal-te hmasawnna a thlen thu a sawi a. Mizoram Sawrkawr pawhin Sawrkar laipui scheme-te a hlawhtlin theih nan tha taka a tawiawm tlat thin thu sawiin, official, khawtlang hruaitu, NGO leh mipuite pawhin tha taka an thlawp thin avangin lawmthu a sawi bawk.

Tribal hnam zinga british awpbehna ata zalên tura beitu mihuaisente chawimawina hun hmanah hian british awpbehna ata zalênna hmu tura dodalna, 'Ulgulan Movement' kalpuitu, India ram puma tribal hruaitu hriat hlawh tak Birsa Munda, Jharkhand bakah Mizo zinga british rorelna dodaltu mihuaisen tak tak - Nikuala, Lianphunga leh Khuangchera te ram tana an inhlanna hriatreng nan Larsap leh official sawm bikte'n an thlalak bulah pangpar an dah a. Pi Chingthanmawii, Adviser -cum-Jt. Secretary, P&PID in kalkhawmte lawmna thu sawiin, Janjatiya Gaurav Varsh awmzia leh lawm a nih dante a sawifiah a. Mizo Cultural Organisation te'n Mizo hnam lam mawi tak takte entirin tribal hnam ziarang leh nunphungte an tarlang a ni.

Janjatiya Gaurav Varsh 2025 lawmna pual hian Tribal Freedom Fighter Wall siam a ni a. Craft, handloom leh food stall-te siam a nih bakah Innovation Exhibition siam a ni bawk a. Programme zawhfel hnu hian Larsap chuan hengte hi tlawhin an hmalak dante zawtin a kawm a. Hengte hi mipuite tlawh theih turin vawiin bakah naktuk hian hawn chhunzawm a ni dawn a, Planning & Programme Implementation Department chuan mipuite tlawh theuh turin a sawm a ni.