Red Bull Aizawl Tlang Ruam buatsaihtu, mentor te leh Sports Minister inkawm

Hnahthial Post | November 7, 2025, Aizawl: Vawiin chawhnu khan Pu Lalnghinglova Hmar, Minister of State, Sports & Youth Services Department chuan a office-ah Red Bull Aizawl Tlang Ruam 2025 (Urban Downhill Racing) neih tur buaipuitu Red Bull aiawhte leh mentor pahnih - khawvel huapa mountain biker langsar - Tomas Slavik leh Pedro Burns te nen inkawmhona hun an nei.

Sports Minister Pu Lalnghinglova chuan Mizoram chhungah ngei khawvel huapa inelna lian, thirsakawr intlansiak hmuhnawm leh rothap kan thleng leh thei tur chu lawmawm a tih chu a sawi a, "Red Bull zarah mountain biking lama khawvela langsar, world class infiammi kan hmu thei dawn a ni," a ti a. "He inelna hian khawvel hriatah Mizoram a tilar a, tunah pawh inelnaa tel tur leh a entu turten Aizawl hotel an luah khat deuh vek tih thu ka dawng a, a lawmawm takzet a ni. Sports keh tourism hi thil kal kawp tlat a ni a, Mizoram sorkar chuan a theihna apiangah puih zel a inhuam," a ti a; Red Bull India aiawhte chuan Mizoram sorkar puihnaah lawmthu an sawi.

Red Bull Aizawl Tlang Ruam hi nikum October 26 khan a vawikhatna’n Upper Republic atanga Hawla Indoor Stadium inkarah hlawhtling taka neih a lo ni tawh a. Kuminah hian November 8, Inrinniah neih tur niin, nikum aia lian zawk, a kawng pawh thui zawk leh harsa zawk turin Upper Republic atanga ITI Veng thleng duan a ni.

Khawvel hmun hrang hrang atang leh India ram state hrang hrang aṭangin mountain biker tha engemaw zat an inel dawn a ni.

Tourism Minister chuan sawi belhin Tourism Department lam atang pawhin he inelna hi a pawimawh hle tih sawiin, Red Bull nen indawr tawnin kum tharah chuan Tourism Calendar buaipui mekah pawh telh ngei ṭha a tih thu a sawi a, "Tun aia nasa zawk hian khualzin hipna tha ni bawk turin he inelna hi a kalpui theih," a ti.

Vawiin inkawmhonaah hian UCI Four-Cross World Champion vawi li ni tawh Tomas Slavik chuan kum hmasa lama Red Bull Tlang Ruam event neih chu a hlawhtling a, khawvel hmun hrang hrang atang Aizawla inelna an neih ang chu neih ve duh an tam phah hle tih a sawi a. He inelna chhim tura lo kal an tam a, an pun belh zel theih tur thu a sawi ve bawk.

Chile aṭanga lo kal thirsakawr khalh thiam hmingthang Pedro Burns chuan, "Tlang rama cheng ve tho ka ni a, Aizawl awm dan hi chu down hill intlansiakna atan duhthusam a ni a, keini ram nen chuan a inang lo. Nikum kha nuam ka ti a, kumin hi a nuam lehzual ang," a ti.

Sports Minister Pu Lalnghinglova Hmar chuan he inelnain a paltlang veng thuneitute chungah lawmthu a sawi a, chutihlaiin a tihbuai mipuite hriatthiamna dil chungin mipui a tam thei ang ber a hmuna en turin a sawm a ni.