Chief Minister-in hmeichhe naupangte kawm

Hnahthial Post | December 4, 2025, Aizawl: Vawiin khan Aizawl Sumtual, MINECO ah Mission Shakti hnuaia State Hub for Empowerment of Women (SHEW), Women & Child Development Department te buatsaih-in Chief Minister Pu Lalduhoma leh hmeichhe zirlai naupangte inkawmna hun “Meet Your CM With Adolescent Girls: A Celebratory Plantation of Trees under BBBP” buatsaih a ni.

A hawnna inkhawm tawiah thu sawi hmasain Chief Minister chuan, tuna kan sorkar hi Mizoram chanchina Cabinet Minister atana hmeichhia nei hmasa ber kan ni a. Kan MLA Pi Baryl Vanneihsangi chuan kan ram rorelna sang ber Assembly Session min lo kaihruai tawh bawk a. A hmasa ber atan Gender Budget kan nei bawk. Kan officer te zingah hmeichhia an tam hle a, sorkar office tin hi han fang ila hnathawktu zingah hmeichhia an lo tam deuh zawk zel thin. Kan sumdawnna hmunte chu kan hmeichhiate enkawl deuh vek an ni. Voters ah hmeichhiate in tam zawk a, mipate aiin in thi tlem zawk zel thin. Tin, kan hman zia leh tihphungah hmeichhiate thliarna a tam lem lova, hnam dangte nena khaikhin chuan a ziaawm pawl tak kan ni awm e.

Kan sorkar hian kan hmeichhiate venhimna leh chawikanna kawnga theihtawp kan chhuah reng a. Tunah pawh hian Working Women Hostel thar tur hi hmun pasarihah kan sa mek a ni, a ti.

SASCI atangin Falkawn, ITI, Thenzawl, Champhai, Lunglei Ramthar veng, Khatla leh Ramhlun Sports Complex-ah te Working Women Hostel hi sak mek an ni a. Neih sa pariat - Aizawlah pali leh Lunglei, Saitual, Mamit leh Siahaah te an awm mek bawk.

Pi Lalrinpuii, Minister, SW,WCD pawhin thu sawiin, WCD Scheme pakhat Mission Shakti hnuaia BBBP (Beti Bachao Beti Padhao) hnuaiah vawiin programme, Chief Minister leh hmeichhe tleirawlte inbiakpawh theihna hun leh thingphunna hun hi hman a ni chu lawmawm a tih thu a sawi a. Hmeichhiate humhimna leh chhawmdawlna Scheme hrang hrang awm te a sawi bakah a hrechiang duh tan engtik lai pawh in 181 (toll-free) ah a call thin theih reng thu a sawi a ni.

Chief Minister hian naupangte nena inkawmna hun a nei zui a, an zawhna hrang hrangte a chhansak bakah fuihna a nei nghal a. Naupangte pawhin nuam an ti tlang hle a ni.

He inkawmnaah hian St Paul’s Higher Secondary School, Govt JL High School, Govt. Chawnpui High School, Neuhof English Medium School leh Mount Carmel School atang tein zirlai hmeichhe tleirawl thlanchhuah te an tel a ni.

Chief Minister hian Aizawl Sumtualah hian Thing a phun bawk.

Pi Lalzarmawii, I.A.S, Commissioner & Secretary, Social Welfare, Women & Child Development (SW,WCD) chuan inkhawm hi a kaihruai a. Chief Minister-in an sawmna a tihhlawhtlinsak avangin lawmthu a sawi a. Pi Zoramthangi Chhangte, Director, WCD chuan lawnthu sawiin inkhawm a khar a ni.