LESDE Minister-in Synod Multipurpose Training Centre Graduation Day hmanpui

Hnahthial Post | December 5, 2025, Aizawl: Vawiin chawhnu dar 1:30 khan Synod Multipurpose Training Centre chuan SMTC Hall, Mission Vengthlangah ‘Graduation Day’ an hmang a, Pu Lalnghinglova Hmar, Minister of State, Labour, Employment, Skill Development & Entrepreneurship Department chuan khuallian niin a hmanpui.

LESDE Minister Pu Lalnghinglova Hmar chuan hnathawhah hlawh tlem a zahthlak loh a, hlawh neih loh hi a zahthlak zawk tih sawiin, trade hrang hranga ‘thiamna’ zirchhuak thalaite chu an hna bul ṭannaah hlawh a sang lo deuh a nih pawhin taima taka an thawh chuan hlawhtlinna a awm tih a sawi. "Bible-in thawk lo chuan ei pawh ei suh se a ti a, chutih rualin hnathawktu chu hlawh hmu tlak a ni, a ti bawk. Heng thil pahnih avang pawh hian hna kan thawk tur a ni a, chumi thawhna tura mamawh 'skill' in zir chhuak hi ka lawmpui takzet a che u" a ti a ni.

Minister chuan sawi chhunzawmin, "Mizo ṭhalai zingah ei ringawt, ei tur zawng ve lo, eizawnna nei lo an tam hi a pawi a, vawiinah chuan eizawnna kawng dap tura intuai hriam Mizo ṭhalai heti zat hi in awm a, a lawmawm hle a ni" a ti bawk.

SMTC hi kum 1996 ah hawn niin hawn tirh atangin trade hrang hrangah training kalpui a ni a, a din tirh atangin thalai 2000 chuangin ‘skill’ an lo zir tawh a ni. Kum 2021 atangin hostel hawn a ni bawk.

Kuminah hian SMTC atangin zirlai 109 in an zirchhuak a ni. Chungte chu Women’s tailoring ah mi 39, Men’s tailoring leh Electric wiring & repairing ah mi 14 ve ve, DCA ah 27, Beauty culture ah 9 leh Mobile repairing ah mi 6 te an ni.

Vawiina SMTC Graduation Day programme hi Rev. H. Lalmuanchhana, Director, SMTC in a kaihruai a ni.