Social Welfare Minister hovin Khawvel puma Rualbanlote Ni hmang

Hnahthial Post | December 3, 2025, Aizawl: Vawiin khan Social Welfare, Women&Child Development Department changtu Minister Pi Lalrinpuii chuan Dawrpui Multi-purpose Hall-ah, Social Welfare, Women&Child Development Department leh SELCO Foundation bakah ALIMCO leh NILD -te tangho huaihawtin Khawvel puma Rualbanlote Ni (International Day of Persons with Disability) chu khuallian niin a hmanpui a. Pi Vanlaldiki Sailo, State Commissioner for Persons with Disability chu khual zahawm a ni.

He hunah hian khuallian Social Welfare Minister Pi lalrinpuii chuan thusawiin, pian phunga rualbanlo, vohbikte puala ni bik a hmanpui thei chu lawmawm a tih thu a sawi a. SELCO Foundation leh Mizoram sawrkar thawhhona chu ropui a tih thu sawiin, technology avanga hmasawnna hmuh theih khawpa lang chu chhuanawm hle a a hriat thu a sawi a. Minister chuan eng hmasawnna pawh, huapzau lo chu a khingbai tih sawiin, Sawrkar pawhin, vantlang hmunte chu rualbanlote pawh awlsam zawka an chet ve theihna tura a ruahman zel thu a sawi a. India ram pum huap pawha infiamna lamah te pawh Mizoram aiawh rualbanlo ten lawmman an la theite chu chhuanawm a tih thu tarlangin, Vohbikte chu, theihtawp an chhuah phawt chuan eng kawngah pawh sang tak an thleng thei tih inhre reng turin a chah a. Hlim taka an pual Ni bik chu hmang turin duhsakna a hlan nghal bawk a ni.

Khualzahawm Pi Vanlaldiki Sailo, Mizoram State Commissioner for PWDs pawhin thusawiin, Vohbikte chu khawtlang tana mi tangkai ni tura inbuatsaih turin a chah a. Mahni inhmu hniam ngai reng reng lo tura fuihin, Sawrkar, kohhran leh khawtlang chu an lama tang tlat leh an hmasawnna tura theihtawp chhuahpui turin an inhuam tih hre reng turin a chah nghal bawk a ni.

Vawiina International Day of Persons with Disability hmanna inkhawm hi Pu Lalnunhlua, Addl. Secy, Social Welfare, Women&Child Development chuan kaihruaiin, kalkhawmte lawmna thu a sawi a. Pi Lalkhawngaihi Renthlei, Asst. Director, CEO, SMPD, Directorate of Ayoush chuan thu a sawi a. SELCO lam atangin presentation ngaihthlak a ni a. Hemi zawh hian Pi Sarju Moirangthem, Officer I/C, NILD, Regional Centre chuan lawmthu sawiin hun hi a khar a ni.