Education Minister hovin Mizoram Education Reforms Committee vawi 14-na ṭhu; School kal hun chhung atan January

Hnahthial Post | January 23, 2026, Aizawl: Vawiin khan MBSE Committee Room-ah Mizoram Education Reforms Committee (MERC) vawi 14-na chu an ṭhu a, Education Minister leh MERC Chairman Dr Vanlalthlana chuan a kaihruai.

He ṭhut khawmah hian MERC leh School Education Department ṭang kawpin mipui leh zirna kaihhnawih pawl leh a fawng vuantute nena inrawn khawmna an lo neihpui tawh hrang hrangte thlirin an sawi ho a. Inrawn khawmnaa rawtna lut leh sawi honaa sawitute rawtnate chu ngaihtuah ho a nih hnuah hetiang hian thutlukna an siam.

1. School calendar: School kal hun chhung atan January to December (calendar year) chu Pawl 1 aṭang Pawl 10 inkar tan hman a ni ang a, HSLC exam erawh chu a pangngaiin a kal ang. He academic session thar hi 2027-2028 session aṭanga hman ṭan tura ruahman a ni.

2. School uniform: School tinin zalenna neiin an duh an thlang thei ang.

3. School kai ṭan hun: Tuna hman lai mek hi hman chhunzawm a ni ang.

4. Hindi zirna chungchang: Hindi zirna tih hmasawnna atan hmalakna hmasaah zirtirtu thawk laite tana training changtlung tak buatsaih a ni ang a. Zirlaiten pawl hniam zawk aṭanga Hindi an thiam nal theihna atan ruahmanna siam niin, a kimchang chu hun remchang hmasa berah puan chhuah a ni ang.

Heng bakah hian MERC meeting chuan 2026-2027 HSLC leh HSSLC board examination result buah top 10, subject topper leh division tar lan ṭhin chu tih tawp a rel a. Tin, English Medium School-te tan 'mahni ṭawng (home language) hman ni' chu kar khatah ni khat siam ni se a ti a. A ni (day) chu school-in an remchan ni ber an thlang thei ang.