MLA Lt. Col. Clement Lalhmingthanga'n Champhai GNM School 2nd Capping and Lamp Lighting Ceremony hmanpui

Hnahthial Post | January 23, 2026, Champhai: Champhai South bialtu MLA Lt. Col. Clement Lalhmingthanga chuan vawiin khan Champhai General Nursery & Midwifery School 2nd Capping and Lamp Lighting Ceremony chu khuallian niin a hmanpui a, Champhai Bawrhsap Pu Mohammad Aaquib chu khual zahawm a ni bawk.

Khuallian Lt. Col. Clement Lalhmingthanga chuan he huna a tel thei hi lawmawm a ti a, an capping leh lamp lighting ceremony pawh nurse an nihna nemnghettu a nih angin urhsun leh ropui taka an kaihruai kha ropui a tih thu a sawi a. Florence Nightingale pawh "Lady with the Lamp" an lo ti tawh thin a, ani ang khan khawvel chhi engtu an nih tawh thu sawiin an hnathawhnaah mi tanpui duhna thinlung nei tur leh midang tana malsawmna ni turin a chah a, khawtlang tan malsawmna ropui tak an nih ngei a rin thu a sawi.

Khual zahawm Pu Mohammad Aaquib chuan thu a sawi bawk a, nurse uniform ha thei tawh an nihna angin damlo leh hliam tuar chi hrang hrang tana beiseina nung ni turin a chah a, an cap leh uniform hak te ti zahawm zel turin a chah a ni.

He hunah hian GNM School Principal Pi Lalengzami Fanai chuan institution chungchang a sawi a, an din dan te, an zirlaite tihthatna te leh an thil tha tih hrang hrang a tarlang a ni. Capping and lamp lighting hi Lawngtlai ANM School Principal Pi F. Lalnunsiami'n a kaihruai a ni. Zirlai pual tana tawngtaina hun Rev. Lalfakawma Chhangte chuan a hmang a, District Hospital Champhai atanga Dr. C. Lallawmkima leh GNM School zirlai hnen atangin special item ngaihthlak a ni bawk.

Capping and lamp lighting ceremony-ah hian nursing student pass chhuak te nurse cap an khum tir a, mawmbati an keng a, chu chu chhit alh sak an ni. He hun hi nursing student te an course an pass chhuah atanga nurse an nihna nemnghettu a ni a, Crimean War-a a hnathawh that avanga khawvel pum hriata nurse lar Florence Nightingale hriatrengna atana tih a ni.