Health Minister Pi Lalrinpuii’n Christ University, Bangalore ah North East Hmathlir chungchang sawihona International Conference hmanpui

Hnahthial Post | January 20, 2025, Bengaluru: Christ University buatsaih - Libernum 2026 - International Conference on Northeast India at the Crossroad:Inclusion, culture and a sustainable future" neih mek chu Health Minister Pi Lalrinpuii chuan Khuallian (Chief Guest) niin a hmanpui a. He hunah hian India ram chhung leh khawvel hmun hrang hrang atanga University professor thahnem tak leh mithiam rualte an tel a ni.

Minister chuan ṭhalaite hnenah North East chu 'Landlocked' ti a sawi tawh lova, 'Land-linked' tia sawi tawh turin a chah. Agartala-Akhaura rail kawng te, Kaladan Multi-Modal Transit leh Asian Highway te avangin kawng engkimah kalpawhna a ṭha tawh hle a ni a ti a.

Kan hnam nunphung leh culture te chu museum-a dah ṭhat mai mai tur a ni tawh lova, khawvel economy inelna sang takah hian 'Intellectual Property' hlu tak a ni tawh zawk a ni. Kan puancheite leh kan ram hnim damdawi te hi khawvel mamawh, a hlutna sang tak a ni tawh tih a sawi bawk.

Digital Democracy leh Inrelbawlna Technology chungchang sawi telin, 4G leh 5G ṭhan chhoh zelna zarah, Mizoram kilkhawr bera cheng zirlai te leh Bengaluru-a awm ten thiamna leh hriatna inang an dawng thei tawh a. Hei hi 'Inclusive Governance' dik tak chu a ni, a ti a ni.

Tin, Hmasawnna leh hriselna chu damdawi in tam lam ringawt ni lovin, mahni rama awm a, eizawnna ngelnghet neih theihna hi a ni a ti a. Aizawl aṭanga London thlenga thil thawn chhuak thei ṭhalai entrepreneur te hi hmasawnna dik tak chu an ni a ti a.

Tin, North East chu India ram boruak thianghlim petu a nih avangin, hmasawnna kan kalpui dan pawh a danglam a ngai a. Eco-tourism te, Carbon credits te leh energy thianghlim hmanga hma lakna chu North East innghahna tur a nih thu a sawi bawk.

He conference-ah hian Mizoram atanga AI lama hma latu LushAITech pawh Christ University nen thawk hovin 'AI Partner' angin an tel ve bawk a ni.