Home Minister hovin Department Review Meeting nei

Hnahthial Post | January 20, 2025, Aizawl: Vawiin khan Home Department changtu Minister Pu K. Sapdanga chuan Planning & Programme Implementation Department Conference Hall, Treasury Square-ah 2025-26 chhunga Home leh a kaihhnawih Department hrang hrangte hnathawh leh hmasawndan te thlir letna leh a kum leh atana hmathlir te sawihona hun (review meeting) chu khuallian niin a hmanpui.

He hunah hian khuallian Home Minister Pu K. Sapdanga chuan thusawiin, Home Department leh a chhung a Department hrang hrang ten mawhphurhna intawm an neih chu Zoram mipuite ralmuanna tura dan leh thupek ken kawhte, ramri venhim leh State pawn atanga lo lutte mumal taka lo kaihhruaite a a ni a ti a. Minister chuan Home Department chu State sawrkar ngaihah pawh Department pawimawh zual bik zing a mi, mawhphurhna sang bik leh office pawn lama hna ngah zawk an nihzia tarlangin, harsatna tawk apiangte zualkona a ni tih a sawi a. Home Department hnate tlin taka thawk tur chuan hna lak atanga uluk a ngaih thu sawiin, ram tana nasa leh zuala thawk chhunzawm zel turin kalkhawmte chu a fuih a; Review meeting chu tangkai leh hlawkthlak taka hmang theuh turin duhsakna a hlan nghal bawk a ni.

Vawiina Review Meeting-ah hian Home department, Mizoram Police leh Fire & Emergency Services te, Prisons, MRHG&CD, Sainic Welfare & Resettlement bakah Forensic Science Laboratory hotute hnen atangin kum kal ta a an hnathawh thlirletna leh hmachhawpte presentation kimchang tak ngaihthlaka thlirho a ni.

Review Meeting hi Home Department Secretary Pu Vanlalmawia chuan kaihruaiin, kalkhawmte lawmna thu leh hun hmandan tur tlangpuite a sawi a. Department hrang hrang presentation leh a kaihhnawih sawihonain zuiin, Minister-in khaikhawmna thu (concluding remarks) a sawi a. Pu P.C. Lalduhthlanga, Jt. Secretary, Home Department chuan lawmthu sawiin hun hi a khar a ni.