DM&R Minister Prof Lalnilawma'n 5th Batch Training of YUVA Aapda Mitra kharna hun a hmanpui

Hnahthial Post | January 20, 2025, Aizawl: Disaster Management & Rehabilitation (DM&R) Department, Government of Mizoram leh 1 Mizo Bn National Cadet Corp (NCC) te thawhhona hnuaiah 5th Batch Training of Yuva Aapda Mitra; ni 13th January 2026 atanga tan chu Mizoram Scouts & Guides Training Center, Tanhril, Aizawl-ah vawiin chawhma dar 10 khan a kharna hun hman a ni a. He Training kharna hun hi Professor Lalnilawma, Disaster Management & Rehabilitation Department Minister chuan Khuallian niin a telpui a ni.

Minister Prof. Nilawma chuan khuarel chhiatna laka invenna leh chet lak dan chungchangah DM&R Department leh 1 Mizo Battalion NCC Aizawl-te tha taka an thawk ho thei chu lawmawm a tih thu a sawi a, hun lo la kal lehzel tur ah pawh thawhhona tha neih a pawimawh thu a sawi. Minister chuan "Khuarel chhiatna hi kan duh vang a thleng a ni lova, kan thu neihna piah lam a nih angin chhiatna hi tawng thei vek kan ni a; mahse khuarel chhiatna a lo thlen hun atana lo inbuatsaih lawk hi kan lo tih ve theih a ni" tiin ⁠Khuarel Chhiatna lo thlen pawh a, chet lak dan zir chu a pawimawh hle a ni, a ti a. He hun a National Cadet Corps (NCC) leh Volunteers kalkhawmte chu khuarel chhiatna a lo thlen palh pawhin midang thlamuan tura hmahruaitu ni turin leh midangte tana inpekna thinlung puchungin, chhanchhuah leh chhawmdawl hna thawk tura inpeih reng turin a fuih bawk a ni.

5th Batch Training of Yuva Aapda Mitra Training-ah hian College pakua (9 – Govt. Mamit College, Govt. Kolasib College, Govt. Serchhip College, Lunglei Govt. College, Govt. Khawzawl College, Kamalanagar Govt. College, Govt. Siaha College, Hatim College, Govt. JB College) atanga National Cadet Corps (NCC) Cadet 112-ten tluang takin Training an zo a. Yuva Aapda Mitra Scheme tum ber chu, khawtlangah chhiatrupna a thlen thulh a, hmun dang atanga chhanchhuaktute an lo thlen hma a, khawtlang miten chhanchhuah hna an lo thawh theih nana thalaite buatsaih hi a ni a. Tun ah hian Lunglei, Champhai, Kolasib, Serchhip leh Mamit District tan Training kalpui mek zel a ni a. Vawiin a Training khar zawh chiah nen hian thalai rual, NCC, NYKS, Bharat Scout & Guides leh NSS mi 531 Trained chhuah an ni tawh.

Training kharnaah hian Disaster Management & Rehabilitation Department atangin Pu Udit Prakash Rai, Commissioner & Secretary, Pu Chuauhnuna, Director leh Pu Francis Lallawmkima, Joint Director (Operation) te, NCC lam atangin Brig. GS Arora te, Lt. Col Ranjit Chandel leh Official dangte an tel a ni.