Transport Minister hovin Mizoram State Road Safety Council thutkhawmah Road Safety Month hman dan tur rel

Hnahthial Post | January 20, 2025, Aizawl: Pu Vanlalhlana, Minister, Transport Department hovin vawiin khan SAD Conference Hall No. 2, MINECO, Khatlaah Mizoram State Road Safety Council chu thukhawmin, Road Safety Month hman dan tur an rel.

Minister Pu Vanlalhlana chuan hawnna thu sawiin, lirthei chungchanga dan kan neih that laiin, ‘road safety’ lama tan lak a ngaih thu a sawi a. India chu USA dawtah khawvela road network nei tha ber a ni a, km nuai 66 chuang a nei tih leh Mizoram kawngpui pawhin hma a sawn zel a, hmun hla anga ngaih thinte pawh hun rei lo te chhungin a thlen theih tawh tih a tarlang a. India rama road accident a pung chho zel tih leh hemi avanga thi leh hliam pawh an tam chhoh zel thu sawiin, he’ng accident zinga zaa 70 te chu lirthei khalh chak vang a ni, a ti a.

Minister chuan sawi zawmin, Ministry of Road Transport and Highways (MoRTH)-in a tarlan dan chuan kum 2024 khan accident tum 4,87,705 a thleng a, mi 1,77,177-te’n nunna chanin, mi 4,71,455-te’n hliam an tuar a; e-DAR atanga a lan danin Mizoramah nikum khan accident tum 73 a thleng a, mi 56-in nunna an chan a, mi 45-te’n hliam an tuar a ni, a ti a. Accident chuan mi tam tak nunna a lak mai piah lamah India ram hausakna pawh a nghawng a. MoRTH leh NITI Aayog-te chhut dan chuan kumtinin India GDP 2.5% atanga 3% thleng chu accident thlen avanga sensoah a hlohtir ziah thu a sawi bawk a.

Minister chuan sawrkar laipuiin ‘road safety’ a ngaih pawimawh thu leh khauh taka dan kenkawh a nih theih nan leh mipuite tana a awlsam zawk nan khawl thiamna hmanga kalpui a tum chhoh zel thu sawiin, lirthei fitness endik te, license exam, lirthei register, insurance leh thil dangah a duh strict tial tial bakah e-enforcement hawi zawngin hma lam kan pan zel a ni, tih a sawi bawk.

Thutkhawmah hian Road Safety Month chu February 2026-a hman tura rel a ni a. Thupui thlan sa, ‘Sadak Suraksha Jeevan Raksha (Road Safety Life Safety)’ tih chu hman tur niin, February ni 2, 2026-ah a hawnna hun hman tura rel a ni a. District tinah Police Department-te nena tanghovin MV Act mila Special Enforcement Drive neih tur a ni a. Zirna in leh sawrkar pisa hrang hrangah Road Safety Pledge chham tura rel a nih bakah, Police leh Transport Department-a thawktute’n kawngpui hmangtute, sikul naupangte leh lirthei khalhtute tan traffic dan leh dun chungchangah te, lirthei chetsualnaa inbawihsawm dan tur te leh bawihsawmtute thubuai laka an himna tur dan (Good Samaritan Law) chungchang te hrilhhriatna hun hmanpui tura rel a ni a.

Road Safety Month-ah hian district tinin MyBharat Portal-ah he thla chhunga lirthei chetsualna thleng zat, hliam zat leh nunna chan zat kum hmasa nena khaikhinna an thehlut tur a ni a, mipuite chu mygov.in portal-a Road Safety Competition-a tel theuh tura sawm an ni bawk. ‘Road safety’ chungchanga mipuite hriat tur pawimawh zau zawka thehdarh dan tur rel niin, he’ng bakah hian lirthei thenkhata bullbar (bumper guard) vuah thin chu midangte tan a him lohzia leh pollution check dana hmasawn ngaihna lai te, MoRTH tanpuina hmanga driver training centre (DTC) din theih a ni tih mipuite hnena thehdarh a ngaih thu te sawiho a ni bawk.

Vawiin thutkhawmah hian Pu C. Lalruaia, Secretary, Transport Department bakah Transport Department official-te leh PWD, H&FW, Planning, UD&PA, Finance, H&TE, School Education, ICT Department leh AMC aiawhte an tel a ni.