Hnahthial District SSC atangin Kum 2025 chhungin sawhthing quintal 17190.37 hralh chhuak

Hnahthial Post | January 21, 2026, Hnahthial: Hnahthial District Agricultural Marketing Committee (DAMC) member-te chu vawiin khan DC Meeting Hall-ah, Bawrhsap leh DAMC Chairman ni bawk, Pi K.Vanlalruati kaihhruaiin an thukhawm a. Kum 2026 chhung, Bana Kaih scheme hnuaia Sawhthing lei leh hralh chhuah dan tur ngaihtuahin nikum lama hmalak tawh dan te thlir let a ni a. District Agriculture Officer (DAO) leh DAMC Member Secretary ni bawk, Pi Julie Zodinpuii chuan Hnahthial District SCC atangin nikum chhung khan sawhthing quintal 17190.37 hralh chhuah a nih thu a tarlang.

Thutkhawmnaah hian agenda hrang hrang, Bawrhsap kaihhruaina hnuaiah sawi ho a ni a. DAMC Vice Chairman leh Addl DC ni bawk, Pu Zothanmawia Khiangte hnen atangin nikum lama sawhthing lei leh hralh an kalpui dan tlangpui ngaihthlak niin Secondary Collection Centre (SCC) aiawh a rawn kal te hnen atangin an buaina leh mamawh te ngaihthlak a ni a. Hriattur pawimawh zual inhrihhriatna, DAMC member-te hnen atangin ngaihthlak a ni bawk.

DAO, Pi Julie Zodinpuii chuan nikum lama sawhthing hralh chhuah dan report pe in, kum 2025 chhung khan Hnahthial District loneitute chuan SCC kaltlangin sawhthing quintal 17,190.37 an hralh chhuah thu leh hralh chhuahna man zawng zawng belhkhawm chu ₹7,68,82,363 a nih thu a tarlang a. District Horticulture Officer (DHO), Pu JH Zosiamliana chuan kumin 2026 atan, Hnahthial District atangin sawhthing quintal 21,000 hralh chhuah theih an beisei thu a sawi bawk.

DAMC hnuaia Sawhthing lei leh hralh kawnga buaina neite tan Redressal cell din leh a ni a. Redressal Cell Member-te chu:-

1. Pu R. Vanlalruata, SDC

2. Pi Linda Lalduhzuali, ADAO

3. Pu Lalsangzuala, RO, Forest

Audit Committee din nghal niin member-te chu:

1. Pu Zothanmawia Khiangte, Addl DC

2. Pu HD Lalpekmawia, PD, DRDO

3. Pu Hmingmawizuala, BDO

4. Pu HB Lalremmawia, DCIO

Hnahthial District-ah hian SCC panga awmin SCC pakhat tan Supervisor pakhat theuh ruat nghal an ni a. Chungte chu :

1. Chhipphir : Pu HD Lalpekmawia, PD, DRDO

2. Hnahthial- I : Pu JH Zosiamliana, DHO

3. Hnahthial - II : Pi Rosy L Fanai, DSO

4. Cherhlun : Dr. C. Sanghluna, DVO

5. Pangzawl : Pu George Lalnuntluanga, DFDO

Supervisor te hi a thachhang dawltu tur, Coordinators te lo ruat tura tih an ni bawk.

Kumin atan hian Sawhthing hi February ni 2 atangin lei leh hralh chhuah tan a ni dawn a. A rate chu hmunpui lam atanga Expert team-ten an duan ang a, District tinah floor price siamin a aia tlawma hralh chu support price pek an ni lovang. A lei duhtu tur ten order an siam hma loh chu cho lawk phal tawh loh niin a dahna tur, Mesh bag chu sawrkarin a tum tawh dawn lova, bag pakhat-ah 35kg aia tam dah phal a ni dawn lo bawk. Bag tinah hian a neitu hming, phone number leh ration card number tarlan tur a ni bawk ang.

Hei bakah hian buyer-te pawisa luhna tur account hran, SCC chuan a nei tawh ang a, a hma thei ang berin loneitute account-ah pawisa hi thun nghal zel a ni tawh bawk ang. A leina man hi full payment hma loh chuan motor release theih a ni tawh dawn lova, Personal Cheque-a payment chu pawm a ni dawn lo a ni.

Sawhthing lei leh hralh kaihhnawih training programme hi tun zirtawpni (23.01.2026) hian neih tura rel nghal a ni.

Thutkhawmnaah hian DAMC member-te bakah SCC tin aiawh an tel a ni.