“Kum 2025-ah 96%-in khualzin an pung; Aizawl hi India rama Krismas khawpuia siam kan tum”

Hnahthial Post | January 21, 2025, Aizawl: Vawiin chawhnu khan Pu Lalnghinglova, Minister of State, Sports & Youth Services leh Tourism Department hovin Mizoram House, Guwahati-ah Aizawl International Half Marathon (AIHM) 2026 leh Mizoram Tourism chungchang Press Conference neih a ni. Minister chuan AIHM 2026 chu February ni 14 ah neih tur a nih thu leh, mi ṭhahnem tak tel tura beisei a nih thu a puang a. Tun hnaiah Mizoram tlawhtu khualzin an pung nasa tih sawiin, kum 2025 ah state pawn mi 8,41,322 in Mizoram tlawhin, hei hi 2024 a tlawhtu aiin 96.9% in a tam tih a tarlang. Press Conference-ah hian Assam leh national media te an kal tha hle.

Sports Minister Pu Lalnghinglova Hmar chuan April, 2025 ah Sports & Youth Services Department, Government of Mizoram leh Innovations India te’n a vawikhatna’n AIHM an buatsaih tih sawiin, “Motor leh thlawhtheihna hmang chauha Mizoram kal theih a ni chungin AIHM 2025 ah state pawn mi thahnem tak an tel a. Athlete, official leh mipui nawlpuiin an hlut hle. Tunah chuan Sairang thleng rel a lut tawh a. Mizoram chu Guwahati rel station atangin tlai khat thilthuah a thlen theih a, thlawhtheihna phei chuan minute 40 thlawk chauh a ni. AIHM 2026 ah chuan state pawn, a bikin Assam atanga tam lehzual an rawn tel ngei kan beisei.” a ti.

Pu Lalnghinglova Hmar chuan AIHM 2026 khuhhawnna Press Conference chu nikum October thlaah New Delhi-ah neih a ni tih a tarlang a. “Inkalpawhna harsat vang leh thlawhtheihna chuan man to vang te, kan inphochhuah thiam loh vangtein Mizoram tlawhtu an thahnem lo thin a. Tunah chuan rel hmangin awlsam leh man tlawm zawkin a kal zung zung theih tawh a, ‘state kilkhawr’ ti a hriat thin chu a inthlak mek. Aizawl chu sawi loh, Mizoram pawh la hrechiang lote hnenah Mizoram tihlar kan duh a, Aizawl International Half Marathon hmanga Mizoram nawmzia puanzar tel kan duh.” a ti bawk.

Pu Rahul Bali, MD, Innovations India chuan Aizawl International Half Marathon chu ‘Athletics Federation of India’ in a pawmpui bakah Sports Authority of India, North East Frontier Railway leh National Cadet Corps te’n an ‘support’ tih a sawi a. Hon’ble Governor, Mizoram chu Patron niin, marathon-ah hian India rama mi langsar tak takte pawh tel an beisei tih a tarlang. AIHM chungchanga hriat tur pawimawh hrang hrang – registration, prize money leh route etc. – te chu aihm2026.com/ ah tarlan a nih thu a sawi bawk.

Brigadier GS Arora, Commander, NCC Group Headquarters pawhin AIHM chu New Delhi-a NCC Headquarters in a support thu leh, NCC cadet tam thei ang tel turin hma lak mek a nih thu a tarlang a ni.

Tourism Minister ni bawk Pu Lalnghinglova Hmar chuan Aizawl chu India ram krismas khawpui, ‘Christmas capital of India’ ah chantir an duh thu a sawi a, “Thlasik boruak nawm lai takin Lammualah ‘Winter Festival’ buatsaih a ni a, mipuiin an hlut hle. December 23 & 24 ah Aizawl khawpuia kawng lun lai ber chu ‘No vehicle zone’ niin mihring tan hawn a ni a, intihhlimna hrang hrang buatsaih a ni thin. December 23 ah ‘Christmas Parade’ hlimawm tak neih thin a ni bawk.” a ti a. December 26-a ‘Krismas Ruaitheh’ chu India ram hmun danga awm ve lo, Aizawl leh Mizoram krismas lawm dan tihlutu leh chhim tichakawmtu a ni, a ti. December 31-ah Sakawrhmuituai tlang mawi tak atangin music nen a huhova kumhlui thlahho thin a nih thu a tarlang bawk.

Minister chuan Aizawl chu traffic dan zawmthatna leh bengchhen lohna, ‘Silent City’ a nih thu pawh tarlangin, “Hei hian khawpui nun a tihahdam a, Ministry of Housing & Urban Affairs pawhin Mizoram sawrkar hnenah ‘Special Award’ a hlan. He award hian Mizo mipuite chu tlawmngai tak leh midang ngaichang thiam an nih a lantir.” a ti. Mizoram tlawhtute’n tih tur leh tlawh tur an hriat a, hun nuam leh hlimawm tak an hman theihna’n ‘Tourism Event Calender 2026’ buatsaih a ni tih Minister chuan a tarlang bawk.

Pu Tetea Hmar chuan Covid-19 boruak reh hnuah a kum telin Mizoram tlawhtu an pung tih sawiin, “State lian zawkte nen khualzin zat ngau ngau khaikhin chi ni lo mah se, kum 2023 atanga 2024 ah 130% chuangin Mizoram tlawhtu an pung a, kum 2025 ah pawh a let deuhthaw, 96.9% in an la pung. Hei hian Mizoram chu tourist te tlawh chak ber zinga mi a ni zel tih a lantir a, kum 2026 ah pawh India rama tourist destination thlanawm ber zingah kan tel ka ring tlat a ni.” a ti.

Minister hi Pi R. Lalrodingi, Director, Tourism Department; Saithangpuia Sailo, DRC, Mizoram House, Guwahati; Pu H. Lalramenga, PS leh Pi Rosie Liannguri, Inspector of Statistics, Tourism Department te’n an tawiawm a ni.