Kutthemthiamte Puihna tur - PM Vishwakarma Scheme chungchang inhrilhhriatna hun hmang

Hnahthial Post | January 19, 2025, Hnahthial: Dsitrict Level Awareness Programme for PM Vishwakarma Scheme chu vawiin khan Hnahthial DC Conference Hall-ah neih niin PM Vishwakarma bakah MSME hnuaia scheme hrang hrang inhrilhhriatna hun hman a ni a. Bawrhsap, Pi K.Vanlalruati chuan khuallian niin industry tam lohna, Mizoram angah chuan he scheme hi hman tangkai thiam a tul thu a sawi.

Bawrhsap chuan PM Vishwakarma scheme awmzia sawifiahin Sawrkar Laipui chuan he scheme bultanna atan cheng vbc 13000 a dah thu te, kutthemthiam, in pho chhuah leh intundin nana an thiamthil hmang duh, sum leh pai nei lo bakah kalhmang hriat loh avanga ti thei lo te tan duan a nih thu te a sawi a. He scheme hnuaiah hian sum leh pai bakah kawng hrang hranga tanpui an nih tur thu sawiin inziaklut duhte tan chuan hun tha a la in hawn zel tur thu a sawi bawk.

Bawrhsap chuan kalkhawm, Vishwakarmas te chu he scheme hlawhtlin leh tlin loh innghahna an nih thu sawiin theihtawp chhuahpuiah a sawm a. He scheme hi eizawn nan a pawimawh tluk zetin Mizo hnam ziarang pho chhuah a, humhim nan a pawimawh thu sawiin kan thil siam chhuahte chu belhchian dawl, rintlak leh tlo ni ngei turin a chah bawk a ni.

Pu HB Lalremmawia, District Commerce & Industries Officer chuan PM Vishwakarma bakah an Department hnuaia Scheme hrang hrangte sawifiahin scheme hrang hrang tum ber pakhat chu unorganized sector-te organized sector-a leh a nih thu a sawi a. Hnahthial District-a hmalakna hmachhawp lian ber pakhat chu Cluster Development a nih thu sawiin Handloom & Handicraft Training Centre pawh siam tum a hma lak mek a nih thu a sawi a. Commerce & Industries hnuaia Scheme hrang hrang zirchiang tura kalkhawmte chu chahin UDYAM registration pawh ti ngei ngei turin a chah nghal bawk. State hrang hrangah inpho chhuahna kawng tam tak siamsak an nih theih thu tarlangin Hnahthial District mipuite chu hmasawnna kawng zawh tur chuan inphochhuah tam a pawimawh thu a sawi a ni.

Pu Samrat M. Jha, Assistant Director Gr-I i/c Br. MSME chuan thusawiina hun tawi hmangin he scheme puala batti eng chhitna hun chu a kaihruai a. Kalkhawm Vishwakarmas te chu India ram intodelhna kawnga sulsutu eng pawimawh tak ni turin a chah nghal a ni.

Pu R. Lalmalsawma, Lead District Manager, Lunglei District bakah Pi Vanlalmawii, Executive Manager, Indian Postal Bank, Serchhip District chuan he scheme in a ken tel, loan leh a kaihhnawih hrilhfiahna hun an hmang a. Dr. C. Hmingsangzuala, Assistant Professor, GHC chuan Digital -Marketing, Literacy leh E-commerce chunchang presentation a pe a ni.

He awareness programme hi Pu Lalthakima, Young Professional, Br. MSME chuan kaihruaiin PM Vishwakarma hnuaia inziak lut, training nei tawh – Vishwakarmas 83-te an kalkhawm a ni.

PM Vishwakarma hi Ministry of Micro, Small & Medium Enterprises (MSME), Ministry of Skill Development & Entrepreneurship (MSDE) leh Department of Financial Services (DFS) hnuaiah awmin Mizoramah chuan Commerce & Industries Department-in an enkawl a. He scheme hnuaiah hian kum 18 tling tawh, Sawrkar Laipuiin 18 traditional trades a tih zinga mi kuththemthiamna nei, sawrkar hnathawk ni lo chhungkua atangin mi pakhat theuh ziahluh theih an ni a. Central Sector Scheme niin loan hi cheng nuai thum thleng, interest rate hniam zawka lak theih a ni.