Mizoram Police Raising Day vawi 54-na lawm

Hnahthial Post | January 21, 2026, Aizawl: Vawiin khan Mizoram Police Raising Day vawi 54-na chu GS Arya Mess, Police Headquarters, Aizawl-ah lawm a ni a. He ni hi Mizoram Police ten ram leh mizo mipuite tana an inpekna thuk tak te, an hun leh nite thahnemngai taka ram tana an hlannate hriat rengna atan hman thin a niin Mizoram Police zinga hnathawk tha leh chawimawi phute chawimawina leh lawmman hlanna hun hman nghal a ni bawk.

Pu Sharad Agarwal, DGP chuan thu sawiin Mizoram Police chu a tirah tlawm tea bul tan ni mah se, tunah chuan thununna tha taka thuam, ram pum leh mipuite innghahna kulhpui an lo ni ta chu ropui a tih thu a sawi a. Kum 1972 ata tawh vawiin thlenga Mizoram boruak inlumlet chhovah Mizoram Police chu ralmuanna thlentu an ni tih tarlangin, chung hun inlumlet mil zela mipuite innghahna an nih theihna bul chu thawktute thawhrimna, chhelna leh inpekna zar liau liau a nih thu a sawi a. Mizoram Police din cham –ah chuan an mite boral tate zahna an hlanin, theihtawp chhuaha Mizoram Police tana lo thawk tawhte pawh zahna an hlan tih a sawi a. Pu Agarwal chuan kum kal taa ruihtheihthil dona kawnga an hmalaknate tarlangin, case 319 lai ziah luh a nih thu leh a kaihhnawiha mi 483 lai man an nih thu a sawi.

Mizoram Police chuan tunlai thiamna changkang ber berte hmanga ruihhlo do chu an chhunzawm zel tur thu leh Demand Reduction leh Harm Reduction lam pawh an uar zual tur thu a sawi a. DGP chuan mipuite’n awlsam zawka online hmanga FIR an theh luh theih nan Police Station zawng zawngah CCTN bun an tum thu sawiin, mipuite leh thawktute tanrualna zarah November ni 19 2025 khan Mizoram chu 18th Urban Mobility India-ah chawimawina hlan a nih thu a sawi a. Ministry of Home Affairs leh State sawrkarin Police-te tunlai thiamna mila thuam chakna tur (Police Modernisation Scheme) hmanga Police-te tha tih chak a ni thei tur chu lawmawm a tih thu sawiin, PMS hnuai atang hian thawktute chu bullet-proof vehicles, forensic software leh hnu chhuina atana pawimawh hmanraw chi hrang hrangte lei a nih tur thute a sawi a. Mizoram Police-te chu infiamna kawngah pawh an duai loh thu leh ram pum leh khawvel pum huap pawha Mizoram leh Police-te tihmingthatu an nih thute a tar lang a. Ram Danpui hnuaia inpumkhat leh inpekna nen thawhhona chhuanawm tak chu chhawm nung zel turin duhsakna a hlan bawk a ni.

Vawiina lawmman sem takte leh chawimawina hrang hrang leh a dawngtute chu hengte hi an ni:

1. DGP’s Cash Reward for Bravery:

He lawmman hi thih hlauhawm, hun harsa tak leh khirh tak hnuaia mahni nunna thapa huaisen taka an hna thawk thinte hnenah hlan thin a ni a. Tun tumah hian Lalremsanga, Driver Grade – II leh Constable T. Lalhruaitluanga, Saitual DEF amite hnenah hlan niin Dr. Ashok Malik, IPS, IGP (Armed) chuan chawimawina hi a hlan a ni. Anni hian ruihhlo do beihpui thlakna, ‘Major NDPS Operation’ neihnaah huaisen takin an bei a, kutthlak leh hliampui tuar chungin ramhnuai hmun khawkrawk leh chengker takahte, ruihhlo tawlhtu ni ngeia rinte chu beiin an umzui a, an inpekna thuk tak avang hian ruihhlo thahnem tak man a nih phah ta a ni.

2. Kendriya Grihmantri Dakshata Padak 2025:

He chawimawina hi India ram pum huap niin Ministry of Home Affairs-in Police hnathawk tha, chawimawi phu a tihte hnenah hlan thin a ni a. Intelligence Category leh Investigation Category-ahte then a ni.

Intelligence Category-a chawimawina dawngtute:

Inspector Lalchhuanmawia, CID (SB)

Head Constable C. Lalfakzuala, CID (SB)

Anni hian ruihhlo leh ralthuam tawlhruk chungchang chhuina kawngah fing tak leh thiam takin, hmun hrang hrang atangin information rintlak an lakkhawm a, a hun tak zelah chung information—te chu hman tangkai niin ruihhlo leh ralthuam tawlhruk chhui chhuahnaah te, law & order kenkawh kawngahte an tangkai hle a ni.

Investigation Category-a chawimawina dawngtu:

Sub-Inspector Samuel Lalramenkima, Mamit DEF – Ani hian ni 13 February 2025 a Kobawi luia ruang hmuh, tualthah thubuai khirh tak mai chu, ruang hmuh a nih atanga darkar 48 chhunga pawikhawihtu chhuichhuah kawngah a thawh that em avangin he chawimawina hi hlan a ni. Sub-Inspector Samuel Lalramenkima leh a team-te hian ni 10 chhungin evidence pawimawh zawng zawng lakhawmin charge sheet an thehlut a, pawikhawihtu a puh mi 8 te an man a ni.

Pi Meghna Yadav, IPS, IGP (Training) chuan chawimawinate hi a hlan a ni.

3. Gallant Warriors Award 2024-2025:

He Award hi Ek Hi Rasta Trust ten ram pum huapa mi huaisente chawimawina an pek thin "Citizens' Gratitude to Gallant Warriors" peng pakhat niin uniform-a inthuam chi, mipa leh hmeichhia, dam lai an ni emaw, mitthi tawh hnu an ni emaw te hnena an pek thin a ni a. Kuminah hian Sub-Inspector J. Lalnghinglova, 1st Battalion, MAP, leh Constable C/627 Lalkhawngaiha, 1st Battalion, MAP te hnenah hlan a ni a. Anni hian helhote huaisen taka an beihna avangin he chawimawina hi hlan niin, an inbeihnaah hian hliampui na tak an tuar phah nghe nghe. Pu Seju P Kurruvilla, IPS, IGP (Crime) chuan he chawimawina hi a hlan a ni.

4. DGP's Commendation Disc & Certificate 2025:

He award hi hmahruai kawngah leh entawntlaka hnathawk tha bikte chawimawina a ni a. Pu Victor Zothansanga, MPS, ASP, Champhai DEF leh Pu Alan Hmangaihsanga, MPS, DSP (Hqrs.), Champhai DEF te hnenah Pu Sharad Agarwal, IPS, DGP chuan he chawimawina hi a hlan a ni. Anni hi heroin hawng 20, kg 7.422, vaibelchhe 2.22 hu mannaah hmahruaitu niin Mizoram Police te record-a high quality heroin man tam ber ala ni nghe nghe.

5. Best Police Station of Mizoram 2025 –

Ministry of Home Affairs chuan kum tinin Police station tha a thlang thin a. Crime data vawng tha te, investigation quality tha te, case chinfel dana ti thate leh mipuite feedback atangtein Police station tha hi thlan thin niin kum 2025-a Best Police Station of Mizoram award dawngtu chu Vaivakawn Police Station a ni a. Pu Sharad Agarwal, IPS, DGP, Mizoram chuan Inspector Zoramsanga, Officer-in-Charge, Vaivakawn Police Station hnenah certificate a hlan a ni.

Vawiin hun hmannaah hian IPS leh MPS retd. mi 18 ten thusawina hun an hmang bawk a, Mizoram Police Unity Band ten rimawi tumin hun hi khar a ni.