Adviser to CM (Finance)-in Laithangpuii College of Pharmacy 10th Graduation Ceremony Programme a hmanpui

Hnahthial Post | February 6, 2026, Aizawl: Pu TBC Lalvenchhunga, MLA, Adviser to CM (Finance) chuan vawiin khan MFM Complex, Durtlangah Laithangpuii College of Pharmacy 10th Graduation Ceremony chu khuallian niin a hmanpui a. Khualzahawm atan Pi C Ramdinmawii, Deputy Director, FDA, DHS hman a ni.

Khuallian Pu TBC Lalvenchhunga chuan thu sawiin, dikna leh chanvo ngaih pawimawh ang chiaha mawhphurhna ngaih pawimawh a tulzia a sawi a. Tunlai khawvel AI-in a thuam tawhna hmunah an thiamnate tangkai zawk leh hlu zawka an hman chhuah theihna turin uluk tak leh thahnemngai taka thawk thin turin graduate tharte chu a fuih a. Mizoram sorkarin healthcare industry theihtawpa thuam chakin, hma a lak zel avangin, pharmacy graduate tharte leh la zir mekte chuan hma hun eng tak an neih thu a sawi bawk a. An thiamna leh theihnate chu mipui tana hmang a, midang tana nun tam nei theuh turin duhsakna a hlan nghal a. Zirlai tithate hnenah Proficiency Award a hlan bawk a ni.

Khualzahawm Pi C. Ramdinmawii chuan Oath Taking Ceremony hmanpuiin, graduate tharte chu Pharmacist-te mawhphurna leh chanvo pawimawhzia leh fimkhur a ngaihzia te, midang hriselna leh nunna nghawng thei thil a nih avangin fimkhur tak leh rinawm taka hna thawk theuh turin leh danin a phut ang zela awm turin a fuih nghal bawk a ni.

Pu Lalramchhuanzela, Executive Director, MFM-in kalkhawmte lawmna hun a hmang a. Pi Lalchhuanmawii, Principal, Laithangpuii College of Pharmacy chuan zirlaite dinhmun tlangpui report pein, zirlai 57 zinga 54-in hlawhtlinna changin, Top 10-ah zirlai 9 an lang a, Distinction-a pass 19, First Division-a pass 35 neiin, pass percentage 94.7% a nih thu a sawi a ni.

Laithangpuii College of Pharmacy hi kum 2014-a din niin, Pharmacy Council of India hnuai affiliated niin, zirlai 417 in D.Pharm an zir chhuak tawh a, tunah hian zirlai 120 an awm mek a. Zirlai chhuak tate hi hmun hrang hrangah thawkin, PHC, hospital, sipaiah leh Japan-ah te thawkin, a thenin entrepreneur kawng zawhin damdawi dawrte siamin hlawhtlinna an nei chho mek zel a ni.