Horticulture Minister-in Mamit-ah Collection Centre cum Warehouse a hawng

Hnahthial Post | February 6, 2026, Mamit: Vawiin khan Pu C.Lalsawivunga, Hon'ble Minister, Horticulture etc chuan Mamit Horticulture Complex-a Collection Centre cum Warehouse chu Khual lian niin a hawng.

Khual lian chuan kalkhawmte chungah lawmthu sawiin, Mamit khua leh a chhehvel tana Collection centre leh Warehouse bakah training-na atana tangkai tak tur hawn a ni chu a lawmawm hle a, a huam pawh a zau hle dawn a ni a ti. Kalphung thar mipui Sawrkar-ah kum 2 chuang awrhah kan Chief Minister zahawm tak hmalakna zarah hmasawnna hmel lawmawm tak tak kan hmu chho mek zel hi a lawmawm tak zet a, Kawlphetha bill bat nasa clear a ni a, pension case chinfel loha awmte chinfel a nih bakah Sawrkar hna thar tam tak lak niin, mipui huapzo Health Care System chu mi tamtakin an chhawr tangkai hle a ni a ti.

Minister chuan Horticulture Department hnuaiah kutthnathawktute hmasawnna turin hma nasa taka lak mek zel a ni a, ruahmanna felfai tak hnuaiah sawhthing lei mek niin, kuthnathawktute tan kawl a eng chho mek zel a ni a ti a.Hmarcha, Aieng leh Sawhthingte khawvel hriata tharchhuah leh hralh tham thar tura tan kan lak a ngai a, khawchhakah sapthei beihpui thlak tum niin chhungkaw engemaw zat thlan an nih dawn thu a sawi bawk. Minister chuan Sawrkarin theihtawpin kuthnathawktute tan hma a lak rualin, a kuthnathawktute'n enge kan tih ve tur kan tih chuan dik tak leh rinawm taka hna kan thawh a ngaia, Sawrkar kaltlanga hmalakna leh puihna kan dawnah taima leh phur taka hma kan lak chuan hlawhtlinna tak tak a awm a ni tiin, rinawmna, taimakna leh tih tak takna nena hmala turin kuthnathawktute a chah a ni.

Pu K. Lianhmingthanga, DHC, Mamit chuan technical report pein Collection centre cum warehouse sakna hi NABARD loan 95% leh state share 5% Rs.167,33,000 seng a sak a ni a, a sak hna hi Ni 7th September, 2024 a thawh tan niin 11th July, 2025 khan sak zawh fel a ni. Mizo pa chhiara chhawng thum niin Collection Centre, Warehouse Block I leh Warehouse Block II bakah Manager Quarter, Chowkider Quarter leh Fencing te a keng tel a ni.

Pu Zonunsanga, VCP New Mamit pawhin khawtlang aiawha lawmthu sawina a nei bawk a ni.

He hun hi Pu C.H Lalmuanpuia, Director, Horticulture chuan kaihruaiin, inlawmna thu a sawi a, Pu B.Lalchamliana, District Horticulture Officer, Mamit chuan lawmthu sawina a nei bawk.

Horticulture Minister hian Mizoram Bamboo Centre, Lengpui, Horticulture Department enkawlna hnuaia Common Facility Centre for Bamboo tlawhin rua leh mau hman tangkaina tura sawngbawlna hmun te a tlawh a, officials te nen hmachhawp leh hmalaknate an sawi ho. Heng bakah hian Hi-Tech Bamboo Nursery tlawh telin Nursery ah hian rawthing, rawnal, rawmi leh phungki rua tiak te a awm a, hengte hi mau ching tute hnena la pek chhuah tur an ni.