School Education Minister hovin Pariksha Pe Charcha thlirho a ni

Hnahthial Post | February 6, 2026, Aizawl: Vawiin khan School Education Minister Dr Vanlalthlana hovin Govt Mizo High School Multipurpose Hall Macdonald Hill-ah Prime Minister Programme Pariksha Pe Charcha 2026 chu live-a thlirho a ni.

He hunah hian School Education Minister chuan kalkhawmte hmaah thusawiin Exam lai hian pressure a san thin avang leh chu chuan zirlai tam takah harsatna a siam thin avangin Psychologist Association-te nen tanghovin helpline siam tum a ni a, tihhlawhtlin theih a nih chuan zirlai tam tak tan a tangkai a beisei thu a sawi. Exam hmachhawn hi thil peihawm loh tak ni mahse puitlinna kawng zawh nan paltlang a ngai a, harsatna paltlang hian chakna min pe a, exam hian chakna min pe thin a ni a ti. Minister chuan kan thluak hi kan hman tam zawh pauh leh a chak a, thluak hi sawizawi a ngai thin tih sawiin Exam hian kan thluak a sawizawi a, a tichak thin a, thluak tihchak turin exam hi a pawimawh a ni a ti. Zirlaite chu lehkhazir nasat laia rilru hrehawmna tihziaawm dan turte ngaihtuah thin turin a chah bawk.

Pariksha Pe Charcha 2026-ah hian Prime Minister Narendra Modi chuan Delhi-ah state tin atanga zirlai thlan chhuah kalkhawmte chu kawmin exam hmachhawn dan turte leh zirlaite zirna atana tangkai tur thil chi hrang hrang a sawipui a, Mizoram atang pawhin Lalthlamuanpuii PM Shri KV School, Aizawl-a Class XII zirlai a tel a ni. He programme hi live-a pekchhuah a ni a, India ram hmun hrang hranga zirlai leh zirtirtuten an lo thlir a ni.

Prime Minister chuan zirlaite chu mark ringawt ngaihtuah lova nun kawng hriatna leh thiamna nei turin a chah a, chumi atan chuan rilru lama inthununna te, hriselna vawn that leh insawizawi te ngai pawimawh turin a chah. Zirlaite chu an hun kal tawh thlir let fo lovin hun an la neih te hmang tangkai zawk turin a fuih a. Exam hi thiam enna a ni a, nun pum luahtu a ni lo tih sawiin zirna kalkawng anga hman tur a ni a ti. Zirlaite chuan lehkha kan zir laiin nuam kan tihna hmun comfort zone chhuahsan tur a ni a, nuam tihna laia awm reng hian nun a chher puitling lo a ni a ti. Prime Minister chuan zirlaite chu faina ngai pawimawh turte, technology chu chhiatpuitu ni lova hmang tangkaitu ni turtein a fuih bawk.

Pariksha Pe Charcha-ah hian zirlai kalkhawmte chuan Prime Minister chu Pariksha Pe Charcha an hlawkpuizia te an hrilh a. Mathematics hlau thin khan Pariksha Pe Charcha atang hian an hlauh tawh loh thu leh thian ang maia an ngaih tak thu te an hrilh a, Prime Minister lehkhabu ziah Exam Worriors tih an chhiar atangin exam dawna rilru hahna nei thinte pawhin an tangkaipuizia te an hrilh a, fail hlau lova hma lam pana lehkha an zir theih tak thu te an hrilh a ni.

Minister hova Pariksha Pe Charcha thlirhona hunah hian School Education Consultant Rev Dr K.Thanzauva te, Secretary Pu David Lalthantluanga te, Mizoram Education Reforms Committee Working Chairman Prof Lalbiakdiki Hnamte te, SCERT Director, MBSE Chairman leh Secretary te, Department officer te, zirlai leh zirtirtute an tel a ni.