Hnahthial Post | February 13, 2026, Mamit: Vawiin khan Pu PC Vanlalruata, Hon'ble Minister Cooperation, Agriculture, Irrigation & Water Resources chuan Zawlnuam khuaah Sangha tin siamna Khual lian niin a hawng a, Pu Robert Romawia, Bialtu MLA Khual zahawm niin a telpui bawk.
Khual lian chuan Mizoram tana mellung thar, rotling tak mai hawn an ni ta chu a buatsaihtu Society leh Department-te thawhrimna leh hmalakna a fakawm hle a ni a ti a. Sangha tin siamna kan kawtkaia hawn a ni ta chu sangha tharchhuah kan hralh lehna kawngah nasa takin kuthnathawktute a pui dawn a, sangha kan manin a lian chiah hralh a nuamin, a man pawh a pangaiin a hralh theih thin a, tunah chuan a te deuh zawk pawh Sangha tinah siam theih a ni dawn ta hi a tha hle a, chutihrual chuan ei leh in siamtu kan nih avangin fimkhur tak leh mipuite'n an duh tur ngeia siamchhuak tura kan inbuatsaih a tul dawn a, Industry hlawhtlinna ber chu min dawrtu mipuite mit kan tlung em,an duhzawng kan siamchhuak em tih ngaihtuahna chang hria a piangin hmasawnna hmel an hmuh thin avangin chutiang ang taka inbuatsaih tur chuan Zawlnuam Fishery Cooperation Society- te a chah a, Sangha tin siamna hmunhma leh hmalak leh zelna turah sawrkarin theihtawpchhuah a in huam thu leh inpawh tlang taka thawkho zel turin a sawm bawk.
Agriculture Minister hian kuthnathawktute thlavang chu Mizoram Sawrkar chuan a hauhna hle a, a bikin khawthlang mipuite tan kuhva sawngbawlna tur Zamuang khuaah buatsaih mek a ni a, Oil Palm chu Mamit District nasa zawka chin tum a, hmalak mek a ni a. Mamit District chu Agriculture bikah Aspirational District atana thlan kan nih avangin hmasawnna tura project hrang hrangte kuthnathawktute nena thawkho chungin siam chhoh a ni dawn a, kuthnathawktute hmasawnna atana an mamawh ber an thlai thar hralhchhuah lehna chu Sawrkarin a ngaihpawimawh ber a nih avangin sawhthing leina kawngah ruahmanna fel fai tak siama a lei mek te hi hmasawnna lawmawm tak a ni a ti bawk.
Pu Robert Romawia Bialtu MLA pawhin thil la awm ngailo, Hachhek bialin kan nei ta leh hawn theih a ni ta chu bial aiawhin lawmthu a sawi a, Zawlnuam Fishery Cooperation Society. Ltd hnuaia Sangha dil nei zawng zawngte pawh hmasawnna nasa zawk nei a, tam zawk leh hlawk zawka thar tura inbuatsaih turin a chah bawk.
Pu Lalthangfala, ARCS chuan technical report pein Zawlnuam Fishery Cooperation Society Ltd. hnuaia Sangha tin siamna khawl hi kum 2024 July thla khan Cooperative Department chuan Sawrkar laipui hnenah thlen sakin, Integrated Cooperative Development Project kaltlangin Rs 65 lakhs hmuh a ni a, khawl lei nan Rs 40 lakhs hman niin, a in sak nan 25 hman a ni. Sangha tin hi vawikhatah kg 50 siam theih niin chu chu a tin chuan tin 120 a niin hemi siam chhuak tur hian darkar 2 chhung hun hman a ngai a ni.
Tags
News