Chief Minister-in District Catalytic Intervention Plan fund sem

Hnahthial Post | March 2, 2026, Aizawl: Vawiin khan Chief Minister Pu Lalduhoma chuan Planning & Programme Implementation Committee room-ah District Catalytic Intervention Plan Fund semna a nei. Mizorama district tinte chu an District Plan a taka an kalpuina tur cheng vaibelchhe khat theuh pek an ni.

Thu sawiin Chief Minister chuan, tun hmain District Planning Committee hi din a lo ni tawh a, meeting te pawh an nei ve thin a. Nimahsela, an district plan te a taka an kalpuina tur fund pek an ni ngai lova. An ruahmannate a takin an kalpui thei thin lo. Kan sorkar hian district-ten hma an sawnna tura anmahni ngeiin plan an nei leh chumi ti hlawhtling tura sum leh pai pek ngei theih hi kan duh a. Vawiinah a bul kan tan ta a. Kan flagship scheme Bana Kaih tihhlawhtlinna pakhat a ni, a ti a.

A enzuina kawngah DC te thuneihna sang tak pek an ni a, project proposal pawh DC te bultuma siam a ni bawk a. He fund a hlawhtlin theih nan hian kan DC ten mawhphruhna pawimawh tak an chelh a ni. A bul kan han tan ang a, kan hman that viau chuan a dang pawh la pek chhuah zel theih tura duan a ni a. Hna kha a chhe tur a ni lo, a ti.

Chief Minister hian Bank Cheque -in fund te hi a hlan a ni.

Pu Vanlaldina Fanai, Commissioner, Planning pawhin thusawiin, hetianga DC ten an district hmasawnna tura an hmalakna atana pawisa a pek tum khatna a ni a. A lawmawmin hmasawnna chhinchhiahtlak tak a ni, a ti.

Inkhawm tawi hi Pu Lalmalsawma Pachuau, Secretary, Planning chuan a kaihruai a. Catalytic Plan kalpui dan tur tlangpui a tarlang bawk.

Deputy Commissioners te aiawhin Er. Lalhriatpuia, DC, Aizawl chuan thu a sawi a. District ten project an neihte hi Mizoram District Transformation Programme zulzuia an kalpui vek a nih thu a sawi a. Scheme dang nena kaikawp (convergence) zawnga kal an awm bawk a. Sorkarin hetianga hmalakna tur fund min pe hi kan lawm a. Kan phur hle a ni, a ti.

He Fund hi Handholding Scheme Component 5 na, Decentralised Plan hnuaia pek an ni a, an pawisa dawn zaa sawm hi Admin Fund atana hman theih a ni ang. An thawh that dan a zir zela la pek belh zel tur a ni.